ఉగాది అంటే ఉదయన్నే లేస్తారు. బొబ్బట్లు, పచ్చడి చేస్తారు. దేవుడికి నైవేద్యం పెడతారు. తర్వాత పంచాంగం వింటారు. కానీ ఆదిలాబాద్ జిల్లాలోని పలు ప్రాంతాల్లో రైతులు ఉగాదిని భిన్నంగా చేస్తారు. వారు ఉగాదిని వ్యవసాయ పనుల ప్రారంభానికి శుభ సూచకంగా భావిస్తారు.
రైతులు వేకువజామున నిద్ర లేచి బసవన్నలను అలంకరించి పొలంబాట పడతారు. అక్కడ తమ ఇష్ట దైవాలకు పూజలు చేసి లాంఛనంగా పనులు మొదలు పెట్టడం ఆనవాయితీగా వస్తోంది. ముఖ్యంగా మహారాష్ట్ర సరిహద్దు మండలాలైన భీంపూర్, జైనత్, బేలా, తాంసి, తలమడుగు తదితర ప్రాంతాల్లో ఈ సంప్రదాయం కొనసాగుతోంది.