వేర్వేరు రోడ్డు ప్రమాదాలు..ఇద్దరు ద్విచక్రవాహనదారులు మృతి

గుంటూరు, అనంతపురం జిల్లాల్లో జరిగిన వేర్వేరు రోడ్డు ప్రమాదాల్లో.. ఇరువురు ద్విచక్ర వాహనదారులు మరణించారు. ఓ చోట కారు, మరో చోట బైక్​ ఘటనకు కారణమని పోలీసులు తెలిపారు. రెండు ప్రమాదాల్లోనూ అతివేగమే కారణమని పోలీసులు తెలిపారు.

అతివేగం ప్రమాదకరం అని పోలీసులు, ప్రభుత్వం ఎన్ని విధాలుగా అవగాహన కల్పిస్తున్నా.. వాహనదారులు పట్టించుకోవడం లేదు. స్వల్ప సమయం కోసం ఆలోచిస్తూ.. విలువైన ప్రాణాలను పణంగా పెడుతున్నారు. గుంటూరు, అనంతపురం జిల్లాల్లో ఈ రోజు జరిగిన రోడ్డు ప్రమాదాల్లో.. ఓ చోట వేగంగా వచ్చిన కారు బైక్​ను ఢీకొనగా.. మరోచోట రాంగ్ రూట్​లో వచ్చి కారును ఢీకొట్టాడు ద్విచక్రవాహనదారుడు.

రోడ్డు ప్రమాద మృతుడు రంగారావు

గుంటూరు జిల్లాలో...

కొల్లూరులో జరిగిన రోడ్డు ప్రమాదంలో కూచిపూడి రంగారావు అనే వ్యక్తి మరణించారు. దోనేపూడి నుంచి కొల్లూరుకు కరకట్ట మార్గంలో ద్విచక్ర వాహనంపై వెళ్తుండగా.. ఎదురుగా వస్తున్న కారు ఢీకొట్టడంతో అక్కడికక్కడే మరణించాడు. బైక్​ని కారు ఈడ్చుకుంటూ వెళ్లగా.. పెట్రోలు లీకై మంటలు వ్యాపించి ద్విచక్ర వాహనం దగ్ధమైంది. కారు డ్రైవర్ పరారు కాగా.. అతడిని అరెస్ట్ చేసే వరకు మృతదేహాన్ని తీసుకువెళ్లమని రంగారావు బంధువులు ఆందోళనకు దిగారు. వారికి నచ్చజెప్పి మృతదేహాన్ని తెనాలి ప్రభుత్వ ఆసుపత్రికి తరలించిన పోలీసులు.. కేసు నమోదు చేసి దర్యాప్తు చేస్తున్నారు.

అనంతపురం జిల్లాలో...

కూడేరు మండలం అరవకూరు వద్ద.. శిక్షణలో ఉన్న ఐపీఎస్ అదిరాజ్ సింగ్ రానా ప్రయాణిస్తున్న కారును ఓ ద్విచక్రవాహనదారుడు రాంగ్ రూట్​లో వెళ్లి ఢీకొట్టాడు. ఈ ప్రమాదంలో కర్ణాటక రాష్ట్రం సిరుగుప్పుకు చెందిన తేజ సాయి మృతి చెందాడు. తన వాహనంలో డ్రైవర్​తో కలిసి కూడేరు పోలీసుస్టేషన్​కు అదిరాజ్ సింగ్ వెళ్తుండగా ఈ ఘటన జరిగింది. కర్ణాటక నుంచి అనంతపురం వైపు స్పోర్ట్స్ బైక్​ మీద వేగంగా వెళ్తూ.. బాధితుడు వాహనాన్ని అదుపు చేయలేకపోయాడని పోలీసులు తెలిపారు. తీవ్రంగా గాయపడిన ద్విచక్రవాహనదారుడిని అనంతపురం ఆసుపత్రికి తరలించగా.. చికిత్స పొందుతూ మృతి చెందాడు.

ఇదీ చదవండి: