ఎల్జీ పాలిమర్స్ పరిశ్రమ నుంచి విష వాయువు విడుదలపై దర్యాప్తు చేస్తున్న కమిటీలు ఎన్ని?... ఏ కమిటీ ఏ పని చేస్తుందో చెప్పాలని కేంద్ర, రాష్ట్ర ప్రభుత్వాల్ని హైకోర్టు ఆదేశించింది. ప్రమాదానికి మూలకారణం ఏమిటో వివరించాలంది. మరోవైపు కంపెనీని ఏ ప్రాతిపదికన ఏర్పాటు చేశారు? బాధ్యులు ఎవరు? తదితర వివరాలతో కౌంటర్‌ దాఖలు చేయాలని ఎల్జీ పాలిమర్స్ సంస్థను శుక్రవారం హైకోర్టు ఆదేశించింది.
పత్రాలు పరిశ్రమలో ఉన్నందున లోపలికి వెళ్లేందుకు అనుమతివ్వాలని కంపెనీ తరఫు న్యాయవాది కోర్టును కోరారు. సుప్రీంకోర్టు 30 మందిని లోపలికి అనుమతిచ్చిందన్నారు. మరో ఇద్దర్ని అనుమతించాలని అభ్యర్థించారు. లోపలున్న కొన్ని వస్తువుల్ని విక్రయించకపోతే పాడైపోతాయన్నారు. ఆ వివరాల్ని పరిగణనలోకి తీసుకున్న ధర్మాసనం విచారణను వారం రోజులకు వాయిదా వేసింది. హైకోర్టు ప్రధాన న్యాయమూర్తి జస్టిస్‌ జేకే మహేశ్వరి, జస్టిస్‌ కె.లలితతో కూడిన ధర్మాసనం శుక్రవారం ఈ మేరకు ఆదేశాలు జారీచేసింది.