తెలుగుదేశం పార్టీ కార్యాలయం, నాయకులపై దాడులకు నిరసనగా తెదెపా రాష్ట్ర బంద్ కు పిలుపునిచ్చింది. ఈ క్రమంలో.. తెల్లవారుజాము నుంచే రాష్ట్రంలోని అన్ని ప్రాంతాల్లో తెదేపా నాయకులు, కార్యకర్తలు నిరసనలు చేపట్టారు. అయితే.. ఆందోళనలను ఎక్కడికక్కడ అడ్డుకుంటున్న పోలీసులు.. తెదేపా నేతలు, కార్యకర్తలను అరెస్టులు చేశారు. మరికొంత మందిని గృహనిర్భంధంలో ఉంచారు. రాష్ట్ర వ్యాప్తంగా ఇదే పరిస్థితి కొనసాగింది.
ప్రకాశం జిల్లా...
తెలుగుదేశం నాయకులు, కార్యకర్తలు తెల్లవారుజామునే ఒంగోలు ఆర్టీసీ బస్టాండ్‌కు చేరుకుని నిరసనలు చేపట్టారు. డిపో నుంచి బస్సులు బయటకు రాకుండా అడ్డుకునే ప్రయత్నం చేశారు. రంగంలోకి దిగిన పోలీసులు.. తెలుగుదేశం కార్యకర్తలను అరెస్ట్ చేశారు. మార్కాపురంలో బస్సులు బయటకి వెళ్లకుండా గేటు వద్ద బైఠాయించిన తెదేపా నేత నారాయణరెడ్డితోపాటు మిగిలిన వారిని అరెస్ట్ చేశారు. దర్శిలో మాజీ ఎమ్మెల్యే నారపుశెట్టి పాపారావును గృహనిర్బంధం చేశారు. కంభంలో జాతీయ రహదారిపై తెదేపా నాయకులు రాస్తారోకో చేస్తుండగా.. వారిని అదుపులోకి తీసుకున్నారు.
గుంటూరు జిల్లా..
రాష్ట్ర బంద్ ను విజయవంతం చేసేందుకు నరసరావుపేట నియోజకవర్గంలో తెదేపా నాయకులు తెల్లవారుజామున ర్యాలీ చేపట్టారు. పట్టణంలో తెదేపా కార్యాలయం నుంచి ఆర్టీసీ బస్టాండుకు ర్యాలీగా బయలుదేరారు. ఈ విషయం తెలుసుకున్న నరసరావుపేట పోలీసులు.. ఓవర్ బ్రిడ్జిపై ర్యాలీని అడ్డుకుని తెలుగుదేశం ఇన్‌ఛార్జి చదలవాడ అరవింద బాబును అరెస్ట్ చేశారు. కృష్ణా జిల్లా నూజివీడులోనూ నేతలను అరెస్టు చేశారు.
పశ్చిమగోదావరి జిల్లా..
జిల్లా వ్యాప్తంగా తెదేపా నాయకులను గృహనిర్బంధం చేశారు. దుగ్గిరాలలో చింతమనేని ప్రభాకర్, ఏలూరులో బడేటి చంటి, భీమడోలులో గన్ని వీరాంజనేయులును గృహనిర్బంధం చేశారు. జంగారెడ్డిగూడెం బస్టాండ్ వద్ద కార్యకర్తలను అరెస్టు చేశారు.
విజయనగరం జిల్లా ..
విజయనగరం జిల్లా సాలూరు వద్ద జాతీయ రహదారిపై తెదేపా నేతలు నిరసనకు దిగారు. దీంతో.. వాహనాలు నిలిచిపోయాయి.
శ్రీకాకుళం జిల్లా..
శ్రీకాకుళం ఆర్టీసీ కాంప్లెక్స్ వద్ద ఎంపీ రామ్మోహన్‌ నాయుడు, మాజీ ఎమ్మెల్యే లక్ష్మీదేవితోపాటు కార్యకర్తలను పోలీసులు అదుపులోకి తీసుకున్నారు. పలాస ఆర్టీసీ డిపో వద్ద ఆందోళన చేస్తున్న వారిని ఠాణాకు తరలించారు.