భారత్ - చైనా సరిహద్దులోని గల్వాన్ లోయ వద్ద జరిగిన ఘర్షణల్లో అమరులైన వీరసైనికులకు కాంగ్రెస్ పార్టీ నివాళులర్పించనుంది. తెలంగాణలోని సూర్యాపేటకు చెందిన కల్నల్‌ సంతోష్‌బాబు సహా 21 మంది భారత సైనికులకు నివాళిగా 'అమరవీరులకు కాంగ్రెస్ సలాం' పేరిట ఓ కార్యక్రమం నిర్వహిస్తున్నట్లు టీపీసీసీ అధ్యక్షుడు ఉత్తమ్‌కుమార్‌ రెడ్డి తెలిపారు.
ప్రధాన మంత్రి నరేంద్రమోదీ వైఫల్యం వల్లనే సరిహద్దులో ఈ ఘటన చోటుచేసుకుందని ఉత్తమ్ ఆరోపించారు. ఉదయం 11 నుంచి మధ్యాహ్నం 12 గంటల వరకు తెలంగాణలోని అన్ని జిల్లా కేంద్రాల్లో, నియోజకవర్గ కేంద్రాల్లో మహాత్మా గాంధీ, ఇతర స్వాతంత్య్ర సమరయోధుల విగ్రహాల వద్ద మౌనదీక్ష చేయాలని కోరారు.