పార్టీ నేతలు అచ్చెన్నాయుడు, ప్రభాకర్‌రెడ్డి, అస్మిత్‌రెడ్డిలను అక్రమంగా అరెస్ట్‌ చేశారంటూ తెలుగుదేశం నేతలు.... రాష్ట్ర వ్యాప్తంగా నిరసన కార్యక్రమాలు నిర్వహించారు. అరెస్టులను నిరసిస్తూ పలు చోట్ల బీసి సంఘాలు రౌండ్‌ టేబుల్‌ సమావేశాలు నిర్వహించి.... గాంధీ, అంబేడ్కర్, పూలె, ఎన్టీఆర్‌ విగ్రహాలకు వినతి పత్రాలు అందజేశారు. అధ్యక్షుడి పిలుపు మేరకు జిల్లాల్లో కాగడాల ప్రదర్శనలు నిర్వహించారు. అమరావతి ఉండవల్లిలోని తన నివాసంలో చేపట్టిన ప్రదర్శనలో అధినేత చంద్రబాబు, వర్ల రామయ్య, బొండా ఉమ ఇతర సీనియర్‌ నేతలు పాల్గొన్నారు. ఈ సందర్భంగా ముఖ్యమంత్రి జగన్‌తో పాటు ప్రభుత్వంపై చంద్రబాబు తీవ్రస్థాయిలో ధ్వజమెత్తారు. తెదేపా నాయకులే లక్ష్యంగా జగన్ దాడులు చేయిస్తున్నారని, బెదిరించి లొంగదీసుకుంటున్నారని మండిపడ్డారు. మాటవినని నేతలను అక్రమ కేసులు పెట్టి అరెస్టులు చేయిస్తున్నారన్నారు. ఏదో విధంగా తెలుగుదేశాన్ని దెబ్బతీయాలనే దురుద్దేశంతోనే జగన్ పనిచేస్తున్నారని దుయ్యబట్టారు.
అభివృద్ధి ఏదీ..?
ఏడాది వైకాపా పాలనలో అవినీతి, కుంభకోణాలు తప్పితే.... మచ్చుకైనా అభివృద్ధి కనపించడం లేదని చంద్రబాబు ఆగ్రహం వ్యక్తంచేశారు. ఇసుక, మద్యం, సాక్షికి ప్రకటన కేటాయింపు, మైనింగ్‌, సరస్వతి సిమెంట్‌ కంపెనీకి 50 ఏళ్లు లీజు వంటి అంశాలపై.... సీబీఐ విచారణ వేయాలని డిమాండ్‌ చేశారు. ప్రభుత్వం చేస్తున్న పనులను న్యాయస్థానాలు తప్పు పడుతున్నా.... వాటికి సమాదానాలు చెప్పకుండా ప్రతిపక్షాలపై అక్రమ కేసులు, దాడులకు పాల్పడి ప్రజల దృష్టిని మళ్లిస్తున్నారని దుయ్యబట్టారు.