45 ఏళ్లు నిండిన ప్రతి ఎస్సీ, ఎస్టీ, బీసీ, మైనారిటీ మహిళకు నెలకు 3వేల పింఛన్ ఇస్తానని జగన్ చెప్పారని... ఇప్పుడేదో వైఎస్ఆర్ చేయూత పథకం కింద 75 వేలు ఇస్తానని చెప్పడం వారిని మోసగించడం కాదా..? అని తెదేపా ఎమ్మెల్యే నిమ్మల రామానాయుడు ప్రశ్నించారు. జగన్ మాటతప్పి, మడమ తిప్పడం వల్లే ఇప్పుడు ఆ మొత్తాన్ని 75 వేల రూపాయలకు పరిమితం చేశారని ఆయన ఆరోపించారు.
ముఖ్యమంత్రి నిర్వాకం వల్ల ఒక్కో మహిళ లక్షా 5 వేల రూపాయల వరకు నష్టపోతోందన్నారు. ఆందుకే.. జగన్ చేసిన తప్పును ఒప్పుకొని మహిళలకు క్షమాపణ చెప్పాలని నిమ్మల డిమాండ్ చేశారు. ఎస్సీ , ఎస్టీ, బీసీ, మైనారిటీ కార్పొరేషన్ల నిధులను జగన్ దారి మళ్లించారని ఆక్షేపించారు. ఎస్సీ, ఎస్టీ, బీసీ సబ్ ప్లాన్ లో ప్రభుత్వం రూపాయి కూడా ఆయా వర్గాలకు ఖర్చు చేయలేదని విమర్శించారు.