TDP LEADER BONDA UMA ON YSRCP MP VIDEO: ఒక డర్టీ ఎంపీని కాపాడేందుకు ప్రభుత్వం వ్యవస్థల్ని నిర్వీర్యం చేస్తుంటే.. రాష్ట్రంలో మహిళలకు భద్రత ఎలా ఉంటుందని తెదేపా పొలిట్ బ్యూరో సభ్యుడు బొండా ఉమ ప్రశ్నించారు. రాష్ట్ర పరువు మంటగలిపిన ఎంపీ గోరంట్ల మాధవ్ ని పోలీసులు, ప్రభుత్వం వెనకేసుకొస్తూ రోజుకో డ్రామా ఆడుతోందని మండిపడ్డారు. పార్లమెంట్ వ్యవస్థకు సంబంధించిన ఈ అంశంపై నిజనిజాలు నిగ్గు తేల్చే బాధ్యత ప్రభుత్వానికి లేదా అని నిలదీశారు. అసలు వీడియో సంపాదించాల్సిన బాధ్యత పోలీసులదా లేక ప్రతిపక్షానిదా అని ప్రశ్నించారు. తాడేపల్లి ఆదేశాలు అనుసరించి ఎంపీని కాపాడేందుకే ఐపీఎస్లు అయ్యారా అని మండిపడ్డారు.
సునీల్ కుమార్ చట్టానికి అతీతుడు కాదని.. తమపై కేసులు పెడతామని బెదిరిస్తున్న సునీల్ కుమార్పై తాము కేసులు పెట్టగలమన్నారు. ఓ వైపు ప్రైవేట్ ల్యాబ్ నివేదికను పరిగణనలోకి తీసుకోమని చెప్తూనే, కేసు పెడతానని ఎలా అంటారని ధ్వజమెత్తారు. సునీల్ కుమార్ చదివింది ఐపీఎస్సా లేక వైపీఎస్సా అని ప్రశ్నించారు. సీఐడీ చీఫ్ ఏ అధికారంతో ఎంపీని వెనకేసుకొచ్చారో చెప్పాలన్నారు. కేసు బాధ్యతలను ప్రభుత్వం సీఐడీకి ఎప్పుడు అప్పగించిందని నిలదీశారు. పోలీసు అధికారులు వీడియోను జాతీయ ఫోరెన్సిక్ ల్యాబ్కి పంపకుండా కబుర్లేందుకని దుయ్యబట్టారు. మాధవ్ ది ఫేక్ వీడియో అయితే ఈపాటికి అది సృష్టించిన వారిని బూటకపు ఎన్‌ కౌంటర్ చేసేవాళ్లని ఎద్దేవా చేశారు.
TDP LEADER PATTABHI:ఎంపీ గోరంట్ల మాధవ్ వీడియోలో ఎడిటింగ్ లేదని జిమ్ స్టాఫోర్డ్ ఇచ్చిన నివేదిక వాస్తవమని తెదేపా అధికార ప్రతినిధి కొమ్మారెడ్డి పట్టాభి స్పష్టం చేశారు. త్వరలోనే మరిన్ని నిజాలతో బయటకు వస్తామన్నారు. మహిళలకు రక్షణ కల్పించే విషయంలో చొరవ చూపని సీఐడీ.. తప్పు చేసిన వారిని వెనకేసుకు రావటం దురదృష్టకరమన్నారు. మద్రాస్ ఐఐటీ నివేదికను ఫోర్జరీ చేసిన చరిత్ర వైకాపాదని తాము అలాంటి పనులు చేయబోమని స్పష్టం చేశారు.
TDP LEADER ANITHA: నగ్న వీడియో విషయంలో.. ఎంపీ గోరంట్ల మాధవ్ ను ప్రభుత్వం, పోలీసులు కాపాడాలని చూస్తున్నారని.. తెలుగు మహిళ రాష్ట్ర అధ్యక్షురాలు వంగలపూడి అనిత ఆరోపించారు. సంబంధం లేని సీఐడీ వాళ్లు వచ్చి.. వీడియోపై వివరణ ఇవ్వటమేంటని ప్రశ్నించారు. ఫోరెన్సిక్ రిపోర్టును ఎప్పుడో విడుదల చేస్తే.. సీఐడీ వాళ్లు ఇప్పుడెందుకు మాట్లాడుతున్నారో అర్థం కావడం లేదన్నారు. ఇన్ని రోజులుగా పోలీసులు ఎందుకు చర్యలు తీసుకోవట్లేదని ప్రశ్నించారు.
సీఐడీ చీఫ్ సునీల్ కుమార్ ఏమన్నారంటే.. ఎంపీ గోరంట్ల మాధవ్ ఉన్నట్లు చెబుతున్న వీడియో అసలైనదేనని అమెరికా ఫోరెన్సిక్ ల్యాబ్ ఎలాంటి ధ్రువీకరణ ఇవ్వలేదని ఆంధ్రప్రదేశ్ సీఐడీ చీఫ్ సునీల్ కుమార్ చెప్పారు. ఆ ల్యాబ్ అధికారి జిమ్ స్టఫోర్డ్‌కు తాము లేఖ రాస్తే.. ఈ మేరకు సమాధానమిచ్చారని ఆయన చెప్పారు. ఆయన ఇచ్చినట్లు సర్క్యులేట్ అవుతున్న పత్రం కూడా అసలైనది కాదని ఆయనే చెప్పినట్లు వెల్లడించారు. అయితే.. ప్రైవేటు ఫోరెన్సిక్ ల్యాబ్ ఇచ్చే ధ్రువీకరణకు ఎలాంటి ప్రామాణికత లేదని సీఐడీ అధినేత సునీల్ కుమార్ చెప్పారు. ఆర్ఆర్ఆర్ సినిమాలో పులులు, సింహాలు ఉన్న సన్నివేశాన్ని ఫోన్‌లో రికార్డు చేసి.. ఫోరెన్సిక్ ల్యాబ్‌కు పంపితే అది ఒరిజినల్‌గానే చెబుతారన్నారు. వీడియో సంభాషణ జరిగిన మహిళ లేదా పురుషుడి ఫోన్లలో రికార్డైన వీడియో దొరికితేనే.. అసలోకాదో తెలుస్తుందని సునీల్ కుమార్ చెప్పారు. ఈ మొత్తం వ్యవహారంలో ఐటీ చట్టం ప్రకారం, సీఆర్పీసీ ప్రకారం కొన్ని తప్పులు జరిగినట్లు సునీల్ కుమార్ తెలిపారు. కాబట్టి చట్ట ప్రకారం చర్యలు తీసుకుంటామన్నారు.