'అందరికీ అనువైన ప్రదేశంలో రేషన్​ సరకులు పంపిణీ చేయాలి'

రాష్ట్ర పౌర సరఫరాల శాఖ కమిషనర్ కోన శశిధర్ సంబంధిత శాఖ అధికారులతో సమీక్షా సమావేశం నిర్వహించారు. ప్రజా పంపిణీ వ్యవస్థ నిరాటంకంగా జరపాలని అధికారులను ఆదేశించారు. అందరికీ అనువైన ప్రదేశంలో సరకులు పంపిణీ చేయాలని తెలిపారు. సరైన తూకంతో నాణ్యమైన సరకులు అందుతుండటంతో లబ్ధిదారులు సంతృప్తిగా వ్యక్తం చేస్తున్నట్లు అధికారులు వివరించారు.

రాష్ట్రంలో లబ్ధిదారులు ఎక్కడైనా రేషన్ తీసుకొనే సదుపాయం ఉందని రాష్ట్ర పౌర సరఫరాల శాఖ కమిషనర్ కోన శశిధర్ అన్నారు. ప్రజా పంపిణీ వ్యవస్థలోని సమస్యలపై విశాఖ కలెక్టర్ కార్యాలయంలో ఆయన.. అధికారులతో సమీక్షించారు. జిల్లా పాలనాధికారి వినయ్​చంద్ సహా జాయింట్ కలెక్టర్ వేణుగోపాల్ రెడ్డి, నర్సీపట్నం డివిజన్ సబ్ కలెక్టర్ మౌర్య, విశాఖపట్నం, అనకాపల్లి, పాడేరు డివిజన్ల అధికారులు హాజరయ్యారు.

సంతృప్తిగా లబ్ధిదారులు..

రాష్ట్రంలో కోటి 50లక్షల మందికి ప్రతీనెల నిత్యవసర సరకులు అందిస్తున్నామని కమిషనర్​కు అధికారులు తెలిపారు. సంచార వాహన యూనిట్ల ద్వారా నిత్యవసర సరుకులు తీసుకొనేందుకు.. వాలంటీర్లు ముందు రోజే కూపన్లు పంపిణీ చేసి.. సరకుల సమాచారం అందిస్తున్నారని వివరించారు. సరైన తూకంతో నాణ్యమైన సరకులు అందుతుండటంతో లబ్ధిదారులు సంతృప్తి వ్యక్తం చేసినట్లు పేర్కొన్నారు.

నిరాటంకంగా ప్రజా పంపిణీ వ్యవస్థ..

ప్రజా పంపిణీ వ్యవస్థ నిరాటంకంగా జరిగేటట్లు చూడాలని కమిషనర్ కోన శశిధర్ ఆదేశించారు. తూనిక యంత్రాల్లో లోపాలుంటే తక్షణమే మరమ్మతులు చేపట్టాలని తూనికలు, కొలతల శాఖకు సూచించారు. అందరికీ అనువైన ప్రదేశంలో సరుకులు పంపిణీ చేయాలని తెలిపారు. ఏజన్సీ ప్రాంతంలో కార్డుదారులకు ఇబ్బంది లేకుండా ఇంటి వద్దకే రేషన్ అందేలా తగు చర్యలు తీసుకోవాలని స్పష్టం చేశారు.

ఇదీ చదవండి: మున్సిపోల్స్: నామినేషన్ల ఉపసంహరణపై ఎస్ఈసీ కీలక ఆదేశాలు