కరోనా ప్రభావం రైల్వే శాఖపై పడింది. ప్రయాణికులు రిజర్వేషన్లను రద్దు చేసుకుంటున్నారు. ఏసీ రైళ్లలో ప్రయాణించే వారిలో ఈ సంఖ్య మరింత ఎక్కువగా ఉంది. నిత్యం రద్దీగా ఉండే రైళ్లు బోసిపోతున్నాయి. కరోనా సెలవులు వచ్చినా.. రైల్వేలో ఆ కళ కనిపించడం లేదు.
ప్రయాణికులతోపాటు వచ్చే వారి రద్దీని తగ్గించేందుకు ఇప్పటికే దక్షిణ మధ్య రైల్వే ప్లాట్ ఫారం టికెట్ ధరను పెంచేసింది. 84 రైల్వే స్టేషన్లలో రూ.10 రూ.50కు, మరో 499 స్టేషన్లలో రూ.10 నుంచి రూ.20కు పెంచేసింది. ప్రయాణికుల సంఖ్య తగ్గడం వల్ల మార్చి 23 నుంచి 30 వరకు నడవాల్సిన 12 రైళ్లను రద్దు చేశారు. మార్చి18 నుంచి 31 వరకు ప్రయాణికుల సంఖ్య స్వల్పంగా ఉండడం వల్ల 17 రైళ్లను రద్దు చేశారు.
ఏప్రిల్ 1వ తేదీన ప్రయాణించాల్సిన నిజామాబాద్-పండాపూర్ రైలును పాక్షికంగా రద్దు చేశారు. మార్చి 19 నుంచి 23 వరకు వెళ్లాల్సిన 8 రైళ్లను దారి మళ్లించారు. ఈ నెల 18,19,21,22వ తేదీల్లో వెళ్లాల్సిన మైసూరు-బాలకోట్, బాలకోట్-మైసూర్ రైళ్లను పాక్షికంగా రద్దు చేశారు. వివిధ కారణాల వల్ల మార్చి 31, ఏప్రిల్ 1వ తేదీన వెళ్లాల్సిన హైదరాబాద్-పూణే, పూణే-హైదరాబాద్ మధ్య రైళ్లను రద్దు చేశారు. ఇలా మొత్తం 39 రైళ్లు రద్దయ్యాయి.
