పోలవరం నిర్మాణం కేంద్రమే చేపట్టాలి: సోమిరెడ్డి
తెదేపా జాతీయ అధ్యక్షుడు చంద్రబాబుపై కక్షసాధింపుతో పోలవరం ప్రాజెక్టును ముఖ్యమంత్రి జగన్ ఇబ్బందుల్లోకి నెడుతున్నారని తెదేపా నేత సోమిరెడ్డి చంద్రమోహన్ రెడ్డి ఆరోపించారు. పోలవరం ప్రాజెక్టు నిర్మాణాన్ని కేంద్రమే చేపట్టాలని వ్యక్తిగతంగా డిమాండ్ చేశారు. దీనివలన కేంద్రానికి మంచిపేరు వస్తుందని అభిప్రాయపడ్డారు. ఈ ప్రాజెక్టు విషయంలో జగన్ వైఖరి చూస్తుంటే నిర్మాణం మరింత సంక్లిష్టమయ్యే అవకాశాలు ఉన్నాయని ఆందోళన చెందారు. పోలవరం యథాతథంగా చేపట్టి ఉంటే తమకు అభ్యంతరం ఉండేది కాదనీ.. ప్రాజెక్టు ఆపేసే పరిస్థితి ఎందుకొచ్చిందని ప్రశ్నించారు. ఈ విషయంలో రివర్స్ టెండరింగ్ సరికాదని హైకోర్టే చెప్పిందని గుర్తుచేశారు.