సామాజిక, ఆర్థిక సర్వే: రాష్ట్ర తలసరి ఆదాయం రూ. 1,69,519

రాష్ట్రంలో తలసరి ఆదాయం 1, 69, 519 రూపాయలకు చేరిందని 2019- 20 సామాజిక, ఆర్థిక సర్వే వెల్లడించింది. ఈ సర్వేను అసెంబ్లీలో కాకుండా క్యాంపు కార్యాలయంలో సీఎం జగన్ విడుదల చేశారు. రాష్ట్ర జీఎస్​డీపీ వృద్ధి 8.16గా ఉందని ప్రణాళిక విభాగం తెలిపింది.

రాష్ట్రంలో తలసరి ఆదాయం గణనీయంగా పెరిగిందని 2019- 20 సామాజిక, ఆర్థిక సర్వేలో ప్రణాళిక విభాగం వెల్లడించింది. రాష్ట్రంలో ప్రస్తుతం తలసరి ఆదాయం 1,69,519 రూపాయలుగా ఉన్నట్లు పేర్కొంది. 2019- 20 సామాజిక, ఆర్థిక సర్వేను ముఖ్యమంత్రి జగన్ విడుదల చేశారు. సీఎం క్యాంపు కార్యాలయం ఈ కార్యక్రమానికి వేదికైంది.

విద్య, వైద్యం, రైతులు, పేదల సంక్షేమాన్ని సర్వేలో ప్రాధాన్యతాంశాలుగా పేర్కొన్నారు. 2019- 20కి రాష్ట్ర స్థూల ఉత్పత్తి(జీఎస్​డీపీ) 9,72,782 కోట్ల రూపాయలుగా సర్వేలో వెల్లడించారు. అంతకుముందు ఏడాదితో పోలిస్తే జీఎస్‌డీపీలో 12.73 శాతం వృద్ధి ఉంటుందని సర్వే నివేదిక పేర్కొంది. మొత్తంగా రాష్ట్ర జీఎస్​డీపీ వృద్ధి 8.16గా ఉందని ప్రణాళిక విభాగం తెలిపింది. 2018- 19తో పోలిస్తే 1,10,000 కోట్ల పెరుగుదల ఉందని నివేదించింది.

స్థిర ధరల వద్ద రాష్ట్ర స్థూల ఉత్పత్తి 6.72 లక్షల కోట్లుగా నమోదైనట్లు సర్వేలో వెల్లడించింది. ప్రస్తుత ధర వద్ద జీఎస్​డీపీలో వ్యవసాయరంగ వాటా 3.2 లక్షల కోట్ల రూపాయలని వివరించింది. పారిశ్రామికరంగం వాటా 1,91,857 కోట్లు... సేవలరంగం వాటా 3,67,747 కోట్లుగా ప్రణాళిక విభాగం వెల్లడించింది. అనుకూల వాతావరణం వల్ల వ్యవసాయరంగ జీవీఏ 18.96 శాతం పెరిగినట్లు సర్వేలో పేర్కొంది. పరిశ్రమల రంగం స్థిర ధరల వద్ద 2019- 20 సంవత్సరానికి 5.67 శాతం వృద్ధి నమోదు చేస్తుందని.. సేవలరంగం 9.11 శాతం మేర వృద్ధి నమోదు చేస్తుందని అంచనా వేసింది.

ఇదీ చదవండి: