'ఎన్నికల అధికారులపై చర్యలకు ఎస్ఈసీ అనుమతి తప్పనిసరి'

పంచాయతీ ఎన్నికల్లో విధులు నిర్వహించే రిటర్నింగ్ అధికారులు, కీలక బాధ్యతల్లో ఉన్న ఉన్నతోద్యోగులు ఎలాంటి బెదిరింపులకు భయపడాల్సిన పని లేదని ఎస్ఈసీ నిమ్మగడ్డ రమేశ్​ కుమార్ స్పష్టం చేశారు. ఈ మేరకు ఎస్ఈసీ ప్రకటన జారీ చేశారు. ఎన్నికల విధుల్లో ఉన్న అధికారులకు ఎస్ఈసీ రాజ్యాంగపరంగా పూర్తి రక్షణ కల్పిస్తుందని భరోసా ఇచ్చారు. మంత్రి పెద్దిరెడ్డి చేసిన వ్యాఖ్యలకు ప్రతిగా ఎస్ఈసీ ఈ ప్రకటన జారీ చేశారు.

ఎన్నికల విధులు నిర్వహిస్తున్న అధికారులను బెదిరిస్తూ ఎంత పెద్దవారు ప్రకటన చేసినా లెక్క చేయాల్సిన పనిలేదని ఎస్ఈసీ నిమ్మగడ్డ రమేశ్​ కుమార్ స్పష్టం చేశారు. ఉద్యోగులు, అధికారులను అస్థిరపరిచేలా చేసే ప్రయత్నాలను ఎట్టిపరిస్థితుల్లోనూ ఉపేక్షించబోమని ఎస్ఈసీ తేల్చి చెప్పారు. అధికారులను బ్లాక్ లిస్టులో పెడతామంటూ మంత్రి పెద్దిరెడ్డి చేసిన వ్యాఖ్యలకు ప్రతిగా ఎస్ఈసీ ఓ ప్రకటన జారీ చేశారు.

పంచాయతీ ఎన్నికల విధి నిర్వహణలో ఉన్న అధికారులు, కీలక బాధ్యతలు వహిస్తున్న రిటర్నింగ్ అధికారులకు ఎలాంటి అభద్రతా భావన అవసరం లేదని ఎస్ఈసీ తన ప్రకటనలో పేర్కొన్నారు. ఎన్నికల నియమావళికి అనుగుణంగా చట్టప్రకారం బాధ్యతలు నిర్వహించే అధికారులకు రాజ్యాంగం పూర్తి రక్షణ కల్పిస్తుందని స్పష్టం చేశారు. ఎన్నికల విధుల్లో ఉన్న అధికారులు ఎన్నికల కమిషన్ రక్షణ కవచంలో ఉంటారని.. వారిపై ఎలాంటి క్రమశిక్షణా చర్యలు చేపట్టాలన్నా ఎస్ఈసీ ముందస్తు అనుమతి తప్పనిసరిగా తీసుకోవాలని పేర్కొన్నారు. దీనిపై సుప్రీంకోర్టు నుంచి స్పష్టమైన మార్గదర్శకాలు ఉన్నాయని తెలిపారు. ఎన్నికల విధుల్లో ఉన్న అధికారులపై ముందస్తు అనుమతి లేకుండా చర్యలను నిషేధిస్తూ త్వరలో ఎస్ఈసీ ఉత్తర్వులు జారీ చేస్తుందని స్పష్టం చేశారు.

అధికారులు, ఉద్యోగులు ఇలాంటి ప్రకటనలపై భయభ్రాంతులకు లోనుకావాల్సిన అవసరం లేదని ఎస్​ఈసీ అన్నారు. అలాంటి ప్రయత్నాలు చట్టరీత్యా చెల్లవన్నారు. ప్రభుత్వ ఉద్యోగులను, అధికారులను భయభ్రాంతులకు గురిచేసే ప్రయత్నాలు అనైతికమని రాష్ట్ర ఎన్నికల కమిషన్ దృఢంగా విశ్వసిస్తోందని అందులో పేర్కొన్నారు. ఎన్నికల విధుల్లో ఉన్న ఉద్యోగులను అస్థిరపరిచే చర్యలను ఏ మాత్రం ఉపేక్షించబోమని ఎస్ఈసీ తేల్చి చెప్పారు. వ్యక్తులు ఎవరైనా తాత్కాలికమేనని, వ్యవస్థలే శాశ్వతమని ఎస్ఈసీ తన ప్రకటన ద్వారా హితవు పలికారు.

ఇదీ చదవండి:'ఎస్​ఈసీ ఆదేశాలు పాటిస్తే చర్యలే.. ఎన్నికల నియమావళి ప్రకారం నడవాలి'