వైకాపా ఎమ్మెల్యే ఎదుట... ఏపీని రక్షించండి అంటూ ప్లకార్డు
రాజధానిలో జరుగుతున్న ఆందోళనలపై స్పందించేందుకు తాడికొండ ఎమ్మెల్యే శ్రీదేవి నిరాకరించారు. గుంటూరులో జరిగిన ఫ్లోరెన్స్ నైటింగేల్ జయంతి కార్యక్రమంలో ఆమె పాల్గొన్నారు. ఈ సందర్భంగా అంబేడ్కర్ విగ్రహానికి పూలమాల వేసేందుకు వెళ్లారు. అయితే అక్కడ ఆంధ్రప్రదేశ్ను రక్షించండి అంటూ ఉన్న ప్లకార్డు ఉండటంతో దాన్ని ఆమెతో ఉన్నవారు తీసేప్రయత్నం చేశారు. శ్రీదేవి కూడా ఓ చేయి వేసి ప్లకార్డును పక్కకు నెట్టేశారు. అనంతరం రాజధానిలో మహిళలు, చిన్నపిల్లలు కూడా ఆందోళన చేస్తున్నారని... దాని గురించి స్పందించమని మీడియా ప్రతినిధులు ఆమెను కోరారు. వాటి గురించి ఇప్పుడు అడగొద్దంటూ ఎమ్మెల్యే శ్రీదేవి సమాధానం ఇచ్చారు.