రాష్ట్రంలో రహదారులు చిన్నాభిన్నమయ్యాయి. పెద్ద పెద్ద గుంతలు ఏర్పడి రాకపోకలు సాగించలేని దుస్థితికి చేరాయి. ఆయా మార్గాల్లో వెళ్లే ప్రయాణికులకు నరకం చూపిస్తున్నాయి. గ్రామీణ, జిల్లా, రాష్ట్ర, జాతీయ రహదారులు అనే తేడా లేకుండా అన్నీ ఘోరంగా దెబ్బతిన్నాయి. ఆర్‌అండ్‌బీలో గత రెండేళ్లుగా మరమ్మతులు చేపట్టలేదు. ఏటా నిర్వహణ పనులను గాలికొదిలేశారు. దీనికి ఇటీవల కాలంలో కురిసిన వర్షాలు తోడవడంతో రోడ్లన్నీ అధ్వానంగా మారాయి. దాంతో వాహన చోదకుల బాధలు వర్ణనాతీతం. రహదారులపైకి రావాలంటేనే వారు ఒకటికి పదిసార్లు ఆలోచించాల్సి వస్తోంది. వాహనాలు కూడా తీవ్రంగా దెబ్బతింటున్నాయి.
ఈ ఏడాది కురిసిన భారీ వర్షాలకు 4,600 కి.మీ. దెబ్బతిన్నాయి. వీటిలో రాష్ట్ర రహదారులు 1,400 కి.మీ కాగా...జిల్లా ప్రధాన రహదారులు 3,200 కి.మీ.గా ఉన్నాయి. వీటిలో తక్షణమే గుంతలు పూడ్చడానికి, ఇతర తాత్కాలిక మరమ్మతులకు రూ.230 కోట్లు, శాశ్వత మరమ్మతులకు రూ.2,630 కోట్ల మేరకు వ్యయమవుతుందని అంచనా వేశారు.
రాష్ట్రంలో జిల్లా ప్రధాన రహదారులు 32,711 కి.మీ.లు ఉండగా, ప్రస్తుత ఆర్థిక సంవత్సరంలో వీటి నిర్వహణకు కేటాయించిన నిధులు అక్షరాలా రూ.15 కోట్లు. వీటిలో ఎన్ని కి.మీ.లు మరమ్మతులు చేస్తారు? ఎంత మేరకు నిర్వహణ పనులు చేస్తారు? గుత్తేదారులకు బకాయిలు ఎంత చెల్లిస్తారనేది ప్రశ్నార్థకంగా మారింది. రాష్ట్ర రహదారుల్లో కూడా మరమ్మతులు, నిర్వహణ పనులకు రూ.150 కోట్లు కేటాయించారు. చేయాల్సిన పనులకు ఈ నిధులు ఏ మాత్రం సరిపోవు.
గుత్తేదారులు వెనకడుగు
ఆర్‌అండ్‌బీలో మరమ్మతు పనులు చేయాలంటేనే గుత్తేదారులు ఆమడదూరంలో ఉంటున్నారు. రెండేళ్లుగా చెల్లింపులు లేకపోవడంతో వారు ఆసక్తి చూపడం లేదు. గతంలో చేపట్టిన మరమ్మతు పనులకు జిల్లా ప్రధాన రహదారుల్లో దాదాపు రూ.200 కోట్లు, రాష్ట్ర రహదారుల్లో రూ.150 కోట్ల మేర బకాయిలున్నాయి. మధ్యలో ఆగిపోయిన వివిధ రహదారుల ప్రాజెక్టుల విలువకూడా రూ.700 కోట్లపైగానే ఉంది. ఇప్పుడు దెబ్బతిన్న రహదారులకు మరమ్మతులు చేసినా..బిల్లులు ఇవ్వరనే ఉద్దేశంతో పలువురు గుత్తేదారులు వెనకడుగు వేస్తున్నారు.