తెలంగాణలోని కరీంనగర్ జిల్లాలో ఓ ప్రైవేట్ పాఠశాల కరస్పాండెంట్‌ చిరుతిండ్లు అమ్మకుంటూ జీవనం సాగిస్తున్నారు. తాను నడిపిస్తున్న ఆ బండికి నిరుద్యోగి అని పేరు పెట్టి.. తన విద్యార్హతలను కూడా దానిపై రాశారాయన. ఇది చూపరులను ఆలోచింపచేస్తోంది.
బడి నుంచి బండికి..
కరీంనగర్ జిల్లా హుజూరాబాద్‌కు చెందిన మట్టెల సంపత్.. ఎంఎస్సీ, బీఈడీ, బీఎల్‌ఐఎస్సీ పూర్తి చేశారు. గతంలో ఓ ప్రైవేటు పాఠశాలలో ఉపాధ్యాయుడిగా పని చేశారు. అనంతరం కరీంనగర్ జిల్లా శంకరపట్నంలో ఓ ప్రైవేట్ స్కూల్ని నడిపించాడు. తనతో పాటు మరో పదిహేను మందికి ఉపాధిని కల్పించాడు. ఇంతవరకు బాగానే ఉంది. కానీ, కరోనా మహమ్మారితో గత ఏడాది నుంచి పాఠశాలలు మూసివేశారు. ఈ పరిస్థితుల్లో చేతిలో పైసలు లేక.. చేసేందుకు పనులు లేక.. ఉపాధి కోసం అన్వేషించాడు.