గడువు మీరిన బకాయిల్ని చెల్లిస్తేనే... కొత్త రుణాల చెల్లింపు అంశాన్ని పరిగణలోకి తీసుకుంటామని జాతీయ సహకార అభివృద్ధి సంస్థ(ఎన్సీడీసీ) రాష్ట్ర ప్రభుత్వానికి తేల్చి చెప్పింది. ఆంధ్రప్రదేశ్తో సుదీర్ఘకాలంగా కొనసాగుతున్న సుహృద్భావ సంబంధాల దృష్ట్యా ఏప్రిల్ 22 నాటికి తమకు చెల్లించాల్సిన రూ.225.89 కోట్లను వెంటనే జమ చేయాలంటూ ఎన్సీడీసీ ఎండీ సందీప్కుమార్ నాయక్ ప్రభుత్వ ప్రధాన కార్యదర్శి నీలం సాహ్నికి లేఖ రాశారు.
రాష్ట్రంలో జొన్న, మొక్కజొన్న, పసుపు పంటల సేకరణకు రూ.2వేల కోట్లను ఏడాది కాలానికి రుణంగా ఇవ్వాలని ఏప్రిల్ 8న ఎన్సీడీసీకి మార్క్ఫెడ్ లేఖ రాసింది. దీనికి రాష్ట్ర ప్రభుత్వం హామీ ఇచ్చింది. అంతకుముందు ఆంధ్రప్రదేశ్లోని సహకార చక్కెర కర్మాగారాలకు ఎన్సీడీసీ 2019 మార్చి, ఏప్రిల్ నెలల్లో 200 కోట్ల రూపాయలను మూలధన రుణంగా విడుదల చేసింది. తొలి విడత రుణాన్ని ఈ ఏడాది ఫిబ్రవరి నెలాఖరులోగా, రెండో విడత రుణాన్ని మార్చి నెలాఖరులోగా వడ్డీతో సహా తిరిగివ్వాలి. మొత్తం వడ్డీతో కలిపి రూ.225.89 కోట్లు చెల్లించాలి. గడువు దాటినా... ఏప్రిల్ 22 వరకు ఈ మొత్తం చెల్లించలేదని.. ఆ ప్రక్రియ పూర్తయితేనే కొత్త రుణం ప్రతిపాదనను పరిగణలోకి తీసుకుంటామని సందీప్కుమార్ లేఖలో పేర్కొన్నారు.