Amaravati: అమరావతి మున్సిపాలిటీ ఏర్పాటుపై గ్రామసభలు.. అంతా వ్యతిరేకతే..!

Amaravati Municipality Opinion Poll : అమరావతిని మున్సిపాలిటీగా ఏర్పాటు చేయాలనే ప్రభుత్వ ప్రతిపాదనకు తొలి రోజే చుక్కెదురైంది. మొదటి రోజు గ్రామసభలు నిర్వహించిన మూడు రాజధాని గ్రామాల ప్రజలు అమరావతిని మున్సిపాలిటీగా వ్యతిరేకించారు. ప్రజాభిపాయ సేకరణ తొలిరోజు ప్రశాంతంగా జరిగింది.

AMARAVATI MUNICIPALITY : రాజధాని ప్రాంతంలోని 22 గ్రామ పంచాయతీలను కలిపి మున్సిపాలిటీ ఏర్పాటుకు ప్రభుత్వం ప్రకటించిన ప్రతిపాదనకు చుక్కెదురైంది. సోమవారం గ్రామసభలు జరిగిన మూడు గ్రామాల్లో ప్రజలు ఏకగ్రీవంగా వ్యతిరేకించారు. గుంటూరు జిల్లా తుళ్లూరు మండలంలోని 19, మంగళగిరి మండలంలోని 3 గ్రామ పంచాయతీలను విలీనం చేసి అమరావతి మున్సిపాలిటీని ఏర్పాటు చేసేందుకు ప్రత్యేక గ్రామసభలు నిర్వహించారు. లింగాయపాలెం, ఉద్దండరాయునిపాలెం, హరిశ్చంద్రపురం గ్రామస్థులు ముక్తకంఠంతో వ్యతిరేకిస్తూ తీర్మానాలు చేశారు. ఇందులో రాజధాని పరిధిలో ఉన్న లింగాయపాలెం, ఉద్దండరాయునిపాలెం గ్రామస్థులు ఎందుకు వ్యతిరేకిస్తున్నామో తెలుపుతూ 12 అంశాలతో కూడిన అభ్యంతరాలను ఇచ్చారు. రాజధాని పరిధిలో లేని హరిశ్చంద్రపురం గ్రామస్థులు 4 అంశాలతో అభ్యంతరాలను అధికారులకు తెలియజేశారు. లింగాయపాలెంలో ప్రభుత్వ ప్రతిపాదనకు మాదల వెంకట శేషగిరిరావు సమ్మతి తెలియజేశారు. ప్రభుత్వ ప్రతిపాదనను78మంది వ్యతిరేకిస్తూ చేతులెత్తారు. అనిల్‌ అనే రైతు మాట్లాడుతూ ప్రభుత్వం రైతులకు వ్యతిరేకంగా చర్యలు తీసుకోవడం కంటే 29 గ్రామాల ప్రజలకు కారుణ్య మరణాలకు అనుమతినిచ్చి మీ నిర్ణయాలు తీసుకోవాలని ఆవేదన వ్యక్తం చేశారు. ఉద్దండరాయునిపాలెంలో గ్రామసభకు హాజరైనవారంతా ఏకగ్రీవంగా ప్రభుత్వ ప్రతిపాదనను వ్యతిరేకిస్తూ తీర్మానం చేశారు. రాజధాని పరిధిలోని 29 గ్రామాలతోపాటు హరిశ్చంద్రపురం, వడ్డమాను, పెదపరిమి గ్రామాలను కలిపి 32 గ్రామాలతో కూడిన మున్సిపాలిటీ ఏర్పాటు ప్రతిపాదనతోపాటు అభివృధ్ధికి స్పష్టమైన మార్గసూచితో వచ్చి గ్రామసభలు నిర్వహించాలని సూచించారు. అమరావతి రైతులు పాదయాత్ర ప్రారంభించిన రోజే గ్రామసభలు నిర్వహించి గందరగోళం సృష్టించడానికే ప్రభుత్వం కుయుక్తులు పన్నిందని రైతులు ఆరోపించారు.

లింగాయపాలెం, ఉద్దండరాయునిపాలెం గ్రామస్థులు తెలిపిన కొన్ని అభ్యంతరాలు ఇలా..

* 2015లో 3 మండలాల పరిధిలోని 29 గ్రామాల్లో భూ సమీకరణ ద్వారా భూములు తీసుకున్నారు. బృహత్తర ప్రణాళిక ప్రకారం అభివృద్ధి చేస్తామని ఇచ్చిన హామీ ఒక్క అడుగు కూడా ముందుకు పడలేదు. రైతులకు ఇవ్వాల్సిన ప్లాట్లు కాగితాల మీద చూపారే తప్ప అభివృద్ధి చేయలేదు. అభివృధ్ధి చేయకుండా మున్సిపాలిటీగా మార్చడం అవగాహన లేని చర్య.

* ఆదాయం లేకుండా మున్సిపాలిటీ చేస్తే ఇక్కడి ప్రజలు కష్టాలు ఎదుర్కొవాల్సి వస్తుంది.

* మూడు రాజధానుల పేరుతో అభివృద్ధి ఆపేసి ఆర్థిక విష వలయంలోకి నెట్టేశారు. ఈ తరుణంలో మున్సిపాలిటీ చేసి కొత్త పన్నులతో మా జీవితాలు చిన్నాభిన్నమవుతాయి.

* సీఆర్‌డీఏ చట్టం ద్వారా ఏడాది పొడవునా ఉపాధి హామీ పథకంలో పని కల్పిస్తామని హామీ ఇచ్చారు. మున్సిపాలిటీ చేస్తే ఈ అవకాశాన్ని కోల్పోతాం.

*ఏపీ సీఆర్‌డీఏ చట్టం ద్వారా 2015లో 29గ్రామాలను క్యాపిటల్‌ సిటీగా పరిగణిస్తూ ‘‘అమరావతి’’ పేరు పెట్టి వివిధ జోన్లు, నవ నగరాలు అభివృద్ధి చేస్తామన్నారు. ఇప్పుడు 19 గ్రామాలకు బయట మూడు గ్రామాలను కలిపి ఒక మున్సిపాలిటీగా, మిగిలిన గ్రామాలను మరో కార్పొరేషన్‌లో చేర్చడం చట్ట విరుద్ధం.

* తాడేపల్లి మంగళగిరి కార్పొరేషన్‌లో కలిపిన ఆరు గ్రామాలపై న్యాయస్థానంలో వ్యాజ్యం నడస్తున్నందున వాటికి అనుబంధంగా ఉన్న మూడు గ్రామాలను విడదీసి మున్సిపాలిటీ ఏర్పాటుకు ప్రతిపాదించడం కోర్టు ధిక్కరణ కిందకు వస్తుంది.

*29గ్రామాలను కేంద్రం స్మార్ట్‌ సిటీగా గుర్తించి అభివృద్ధి చేస్తున్నారు. ఇప్పుడు ప్రభుత్వం ప్రతిపాదించిన విధంగా గ్రామాలను విడదీస్తే ప్రగతికి ఆటంకం ఏర్పడుతుంది.

* 29 గ్రామాలను హెరిటేజ్‌ గ్రామాలుగా అభివృద్ధికి ప్రణాళికలు రూపొందించారు. ఇప్పుడు విడగొడితే ఆ ప్రయోజనాలు దెబ్బతింటాయి.

* ఏపీ సీఆర్‌డీఏ చట్టం అనుసరించి భూ సమీకరణ పథకం మధ్యలో నిలిచింది. ఈ సమయంలో ఇటువంటి ప్రతిపాదన మా ప్రయోజనాలకు విఘాతం.

* ప్రతిపాదిత తీర్మానాలు గ్రామసభ ద్వారా ప్రవేశపెట్టి ఆమోదింపజేయడంలో అనేక రాజ్యాంగ ఉల్లంఘనలు ఉన్నాయి.

ఇవీ చదవండి: