సీఎం జగన్ చుట్టూ కొందరూ వ్యక్తులు చేరి నటిస్తున్నారని ఎంపీ రఘురామకృష్ణరాజు విమర్శించారు. వారిని నమ్ముతున్న ముఖ్యమంత్రి జగన్ పదవులు ఇస్తున్నారని అన్నారు. అలాంటి వ్యక్తులను గుర్తిస్తే పార్టీకి మంచి జరుగుతుందని సూచించారు. మంచివాళ్లను, నటించేవాళ్లను గుర్తించే శక్తిని సీఎం జగన్ కు భగవంతుడు ప్రసాదించాలని కోరుకున్నానని చెప్పారు.
'సీఎం జగన్ ను కలిసే అర్హత నాకు లేదంటున్నారు. అలాంటి అవకాశం లేదంటున్నందుకు నాకు బాధగా లేదు. ఇంకా మంచి వ్యక్తులను కలిసే అవకాశం ఉంది. సీఎం గారూ... మీ పేరు చెప్పి కొందరు అక్రమాలకు పాల్పడుతున్నారు. మీరు జాగ్రత్తగా ఉండండి. నాకు పీలేరు నుంచి కొందరు ఫోన్లు చేసి బెదిరింపులకు పాల్పడ్డారు. సమయం, ప్రదేశం చెబితే నేనే వెళ్తాను. ఏం చేస్తారో చూస్తా. నా నియోజకవర్గానికి వెళ్లేందుకు నాకెందుకు భయం? నియోజకవర్గానికి వెళ్తే వేల మంది వస్తారు. కరోనా కారణంగానే నేను వెళ్లటం లేదు '- ఎంపీ రఘురామకృష్ణరాజు