MP Nani In Loksabha on Special Railway Zone: రాష్ట్ర విభజన జరిగిన ఏడేళ్లయినా ఇప్పటికీ హామీలు నెరవేర్చలేదని లోక్‌సభలో తెలుగుదేశం ఎంపీ కేశినేని నాని ప్రశ్నించారు. స్వయంగా ప్రధాని హామీ ఇచ్చినా.. ప్రత్యేక రైల్వేజోన్ పనులు ఇప్పటికీ ప్రారంభించలేదని ఆయన నిలదీశారు. ఎప్పటిలోగా రైల్వేజోన్ ఏర్పాటు చేస్తారో ఖచ్చితమైన తేదీ ప్రకటించాలని కోరారు. దీనిపై స్పందించిన రైల్వేమంత్రి అశ్వని వైష్ణవ్‌, ఇప్పటికీ డీపీఆర్‌ సహా కీలక పనులు తుది దశలో ఉన్నాయని వీలైనంత త్వరగా పనులు చేపడతామని హామీ ఇచ్చారు.
"రాష్ట్ర విభజన సమయంలో ఏపీకి ప్రత్యేక రైల్వేజోన్ ఏర్పాటు చేస్తామని హామీ ఇచ్చారు. విభజన చట్టంలోనూ ఈ విషయం పొందుపరిచారు. ఇప్పటి వరకు ఎలాంటి పనులూ ప్రారంభించలేదు. దక్షిణ కోస్తా రైల్వేజోన్ ప్రక్రియ త్వరలో ప్రారంభమవుతుందని ప్రధాని మోదీ సైతం ప్రకటించారు. 2019 ఫిబ్రవరి 27న రైల్వేమంత్రి సైతం దక్షిణ కోస్తా రైల్వే జోన్ ప్రకటన చేశారు. కానీ ఇప్పటి వరకు ఎలాంటి పురోగతి లేదు. పనులు ప్రారంభించకపోవడానికి కారణాలు తెలపడంతోపాటు.. ఎప్పటిలోగా ప్రారంభిస్తారన్నది ఖచ్చితమైన తేదీ ప్రకటించాలని రైల్వేమంత్రిని కోరుతున్నాను."- కేశినేని నాని, తెదేపా ఎంపీ