"రాజధానిగా అమరావతిని కొనసాగించే పరిస్థితుల్లో వైకాపా లేదు"

రాజధాని అమరావతిపై మంత్రుల వ్యాఖ్యలు  గందరగోళం సృష్టించేలా ఉన్నాయని ఎంపీ జీవీఎల్ అన్నారు. దిల్లీలో మీడియా సమావేశంలో మాట్లాడిన ఆయన...రాజధానిగా అమరావతిని కొనసాగించే ఆలోచనలో వైకాపా ప్రభుత్వం లేదనిపిస్తోందని వ్యాఖ్యానించారు. రాజధానిలో అక్రమాలు జరిగాయంటున్న మంత్రులు..తగిన ఆధారాలను ప్రజల ముందు ఉంచాలన్నారు.

అమరావతిలో రాజధానిని కొనసాగించే యోచనలో వైకాపా ప్రభుత్వం లేదనిపిస్తోందని భాజపా ఎంపీ జీవీఎల్ అన్నారు. రాజధానిని కొనసాగించకుంటే భూములిచ్చిన రైతుల పరిస్థితేంటని ప్రశ్నించారు. రాజధానిపై మంత్రుల వ్యాఖ్యలు గందరగోళాన్ని సృష్టిస్తున్నాయని అన్నారు. రైతులకు నష్టం వాటిల్లకుండా ప్రభుత్వం చర్యలు తీసుకోవాలని సూచించారు. ప్రజాధనం దుర్వినియోగం కాకుండా తగిన చర్యలు తీసుకోవాలన్న ఆయన... రాజధానిని మారిస్తే భూములిచ్చిన రైతులు నష్టపోతారని వ్యాఖ్యానించారు.

కక్ష సాధింపు చర్యలు ఉండరాదు..

రాష్ట్ర ప్రభుత్వం తీసుకునే ప్రతి నిర్ణయం ప్రజా ప్రయోజనాల కోసమే ఉండాలని అన్నారు. రాజకీయ కక్ష సాధింపు చర్యలుగా ఉండరాదని హితవు పలికారు. ఇన్​సైడ్ ట్రేడింగ్ పై స్పష్టమైన ఆధారాలు ప్రజల ముందు ఉంచాలని పేర్కొన్నారు.

అనుకున్న రీతిలో అభివృద్ధి లేదు..

రాజధాని అమరావతిలో ఉండాలనేది అప్పటి ప్రభుత్వం తీసుకున్న నిర్ణయమని జీవీఎల్ అన్నారు. భవనాల నిర్మాణం కోసం రూ.2,500 కోట్లిస్తామని కేంద్రం ఒప్పకుందని గుర్తు చేశారు. రూ.1500కోట్లు తాత్కాలిక భవనాల కోసమే ఉపయోగించుకున్నారని తెలిపారు. రాజధాని అంశం పూర్తిగా రాష్ట్ర ప్రభుత్వ పరిధిలో ఉందని వ్యాఖ్యానించారు. అనుకున్న రీతిలో తెదేపా ప్రభుత్వం అభివృద్ధి చేయలేదని అభిప్రాయపడ్డారు.

బాధ్యులు ఎవరు..?

గత ప్రభుత్వంపై వస్తున్న ఫిర్యాదులపై ప్రస్తుత ప్రభుత్వం చర్యలు తీసుకోవాలన్న జీవీఎల్...అనవసర ఖర్చులు చేసిన దానికి ఎవరిని బాధ్యులుగా నిర్ధరిస్తారని ప్రశ్నించారు. తనకున్న సమాచారం ప్రకారం వైకాపా రాజధాని కొనసాగించే ఆలోచనలో లేనట్లు తెలిసిందని వ్యాఖ్యానించారు.