తెదేపా హయాంలో పేదలకు ఇచ్చిన ఇళ్ల స్థలాల్లో నిర్మించుకున్న గుడిసెలను కూల్చివేస్తున్నారంటూ తెదేపా జాతీయ ప్రధాన కార్యదర్శి లోకేశ్ మండిపడ్డారు. కర్నూలు జిల్లా ఎమ్మిగనూరు పట్టణంలో తెదేపా హయాంలో ఇచ్చిన ఇళ్ల స్థలాల్లో నిర్మించుకున్న గుడిసెలను కూల్చివేయడం సీఎం జగన్ అహంకార ధోరణికి నిదర్శనమని ఆగ్రహం వ్యక్తం చేశారు. పాదయాత్రలో పేదలకు ముద్దులు పెట్టి.. ఇప్పుడు పిడిగుద్దులు గుద్దుతున్నారని విమర్శించారు.
పేదల భూములను లాక్కొని తిరిగి పేదలకే అమ్మడం సీఎం రివర్స్ టెండర్ మార్క్ అని లోకేశ్ ఎద్దేవా చేశారు. 'మీకు రాజప్రాసాదాలు కావాలి కానీ పేదవాడికి గుడిసె వేసుకునే హక్కు లేదా' అంటూ ప్రశ్నించారు.