పరీక్షలంటే భయమేల.. వలదు వలదు

సబ్జెక్టు విషయంలో క్లాస్ రూమ్​లో కాలర్ ఎగరేసుకుంటూ తిరిగే వాళ్లు పరీక్ష కేంద్రంలో మాత్రం జీరో. ప్రశ్నలకు నిద్రలో లేపి అడిగినా సమాధానం చెప్పేవాళ్లు.. పరీక్ష కేంద్రం గేటు చూడగానే గుండెలో దడ... ఎందుకు ఇలా. ఎప్పుడైనా ఆలోచించారా?

విద్యార్థులకు క్లాస్​ రూమ్​లో ఉన్నప్పుడు అన్ని సబ్జెక్టులు తెలిసినవే. రఫ్పాడించేస్తా అనుకుంటారంతా. ఉపాధ్యాయుడు ఏదైనా ప్రశ్న వేస్తే.. నేనే చెప్తానంటూ.. ఒకటే గోల. మరీ పరీక్ష కేంద్రంలో మాత్రం తెల్లముఖం ఎందుకు? ఎక్కడుంది లోపం. మీకున్న కంగారే.. అనర్థాన్ని ఆహ్వానిస్తుందని గమనించారా?

అనవసరమైనవి రాయడమెందుకు..?
రాసే విధానం పట్ల స్పష్టత లేకపోతే, సబ్జెక్ట్‌ తెలిసి కూడా తెలియనట్లే అనిపిస్తుంది. సబ్జెక్ట్​ గురించి ఎక్కువో.. తక్కువో.. మీకైతే తెలిసే ఉంటుంది కదా. మరీ భయమెందుకు.. పరీక్షా కేంద్రం గేటు దగ్గరకు వెళ్లగానే కళ్లలో నీళ్లు తిరుగుతాయెందుకు? కొందరికైతే.. ఏకంగా జ్వరం వచ్చేస్తుంది. మీకు సబ్జెక్ట్ తెలిసినపుడు భయం వదిలేస్తే.. మీరే టాపర్. మీరు దృష్టి పెట్టాల్సిందల్లా ప్రశ్నలకు సమాధానాల్ని పొందికగా రాసే(ప్రజెంటేషన్​) విధానంపైనే. మీకు ఆ ప్రశ్న గురించి తెలిసే ఉంటుంది. ఆ విషయాన్ని స్పష్టంగా.. సూటిగా.. సుత్తిలేకుండా రాయండి. కొందరైతే.. ఎంత ఎక్కువ రాస్తే.. అన్ని మార్కులు వస్తాయని ఆలోచనలో ఉంటారు. పేపర్ వాల్యుయేషన్ చేసేవాళ్లకు ఆ మాత్రం తెలిసే ఉంటుంది కదా. మరీ అనవసరమైనవి రాయడమెందుకు?

ఇవి తప్పక పాటించండి..
ప్రశ్నకు సంబంధించిన సమాధానాన్నే అర్థమయ్యేలా రాయండి. ప్రతి పేరాకు కింది పేరాతో లింక్ ఉండేలా ప్రయత్నించండి. పదాలకు మధ్య ఎంత దూరం ఉంటే బాగుంటుందో చూసుకోండి. పేరా పేరాకు మధ్య దూరం ఉంటే చూసేందుకు బాగా కనిపిస్తుంది. రాత సరిగా లేనివాళ్లు.. కాస్త అర్థమయ్యేలా రాయండి. ఎగ్జామ్ హాలులోని గోడపై బల్లిని చూస్తూ.. రాస్తున్నట్లు రాస్తే.. ఎక్కడో మెుదలై.. రాత ఎక్కడికో వెళ్తుంది. తర్వాత ఏం చేయాలో అర్థంకాక తల గోక్కోవడం మీ వంతు అవుతుంది. కొట్టివేతలు లేకుండా చూసుకోండి. చూసేవాళ్లకు చిరాకు తెప్పించేలా పేపర్​ను చెత్త చెత్త చేయొద్దు.

దేవుడికి దండం పెట్టుకునే అలవాటు ఉంటే.. మనసులో పెట్టుకోండి. పేపర్​పై ఓం లాంటివి రాసి.. తర్వాత ఇబ్బంది పడకండి. ఉపాధ్యాయులు, టీచర్లు అందరూ సబ్జెక్ట్ చెప్పేవాళ్లే.. అబ్బా ఎంతో చెప్పేశాం అనుకుంటారంతా. కానీ ప్రజంటేషన్ గురించి మాత్రం ఎవరూ చెప్పరు. దానిపైనా.. దృష్టి పెట్టండి.

ఇదీ చదవండి : కుమార్తెకు పెళ్లి కానుకగా ఎడ్ల బండిలో 2200 పుస్తకాలు