కరోనా ఎఫెక్ట్​: చైనాపై బిగుస్తున్న మన 'పట్టు'

కొవిడ్​ -19 (కరోనా) ఈ పేరు ప్రపంచ దేశాలను వణికిస్తోంది. ఆక్వా రైతులకు శాపంగా మారిన కోవిడ్​-19 వైరస్​.. భారతదేశంలో పట్టు రైతులకు వరంగా మారింది. చైనాపై కరోనా వైరస్​ ప్రభావం.. మన దేశంలోని పట్టు రైతులపై సిరులు కురిపిస్తోంది.

చైనాలో కరోనా వైరస్​ ప్రభావంతో రాష్ట్రంలోని పట్టుకు డిమాండ్​ పెరిగింది. చైనాలోని కరోనాకు.. మన రాష్ట్రంలోని పట్టుకు సంబంధం ఏమిటనుకుంటున్నారా?... చైనా సిల్క్​.. స్వదేశీ పట్టుకు పోటీగా దిగుమతి అయ్యేది. నాణ్యత బాగుండి ధరల్లోనూ వ్యత్యాసం ఉన్న కారణంగా.. జాతీయ మార్కెట్‌లో మన పట్టుకు డిమాండ్‌ తగ్గి రేట్లు అంతంత మాత్రంగానే ఉండేవి. కరోనా వైరస్‌ ప్రభావంతో చైనా సిల్క్‌ ఒక్కసారిగా ఆగింది. స్వదేశీపట్టుకు డిమాండ్‌ ఏర్పడి.. పట్టుగూళ్ల ధరలు ఊపందుకొన్నాయి.

కళకళలాడుతున్న హిందూపురం మార్కెట్​

మార్కెట్‌లో కిలో బైవోల్టిన్‌ రూ.400-500 మధ్య ఉండే పట్టుగూళ్ల ధరలు.. ఒక్కసారిగా రూ.113 పెరిగాయి. ప్రస్తుతం కిలోకు రూ.613కు ధర చేరింది. ఫలితంగా.. రైతులు, రీలర్లలో ఆనందం వెల్లివిరుస్తోంది. తెలుగు రాష్ట్రాల్లోనే అనంతపురం జిల్లా హిందూపురం పట్టుగూళ్ల మార్కెట్‌ అగ్రగామి. ఇక్కడికి నిత్యం 3-4 టన్నుల పట్టుగూళ్లు వచ్చేవి. ప్రస్తుతం 6 టన్నులు వస్తున్నాయి.

పెరిగిన డిమాండ్​

గతంలో పట్టు రైతులు.. చైనా సిల్క్‌ దిగుమతులు రద్దు చేయాలని ప్రభుత్వంపై ఒత్తిడి తెచ్చినా పెద్దగా స్పందించలేదు. కరోనా వైరస్‌తో ఒక్కసారిగా దిగుమతులు తగ్గడం, దొడ్డిదారిన సిల్క్‌ వచ్చే అవకాశం లేని కారణంగా స్వదేశీ సిల్క్‌కు జాతీయంగా డిమాండ్‌ ఏర్పడింది. మార్కెట్‌లో వారం రోజుల్లోనే సిల్క్‌ కిలోపై రూ.500 వరకు పెరిగి రూ.3,550 వరకు చేరింది. ఈ ధరలు మరింత పెరిగే అవకాశం ఉంది. మొన్నటివరకు బెంగళూరు, చెన్నై, ప్రొద్దుటూరుకు.. ఇక్కడి స్వదేశీ సిల్క్‌ తీసుకెళ్లి విక్రయించుకునేవారు. ఇప్పుడు డిమాండ్‌ పెరగిన పరిస్థితుల్లో మధ్యవర్తులు, వ్యాపారులు కొనుగోలుకు హిందూపురం మార్కెట్​కు వస్తుండటం విశేషం.

ఇదీ చదవండి:

'కరోనా'పై పోరాటానికి చైనాకు అండగా భారత్​