ప్రస్తుతం తెలంగాణలో బాలికలపై అత్యాచారాలు, లైంగిక వేధింపుల పాశవిక ఘటనలు వెలుగుచూస్తున్న ఈ క్రమంలో.. నాలుగేళ్ల కింద జరిగిన ఓ విభిన్నమైన ఘటనలో కోర్టు తీర్పు వెలువరించింది. సైదాబాద్లో ఆరేళ్ల చిన్నారిని అత్యంత కర్కశంగా హత్యాచారం చేసిన కామాంధున్ని ఎన్కౌంటర్ చేయాలని డిమాండ్ తీవ్రంగా వెల్లువెత్తిన తరుణంలో.. నిందితుని ఆత్మహత్యతో ప్రజాగ్రహం చల్లారింది. అదే తరుణంలో.. అందుకు భిన్నంగా.. ఓ బాలునికి జరిగిన మరో ఘటనలో ఎట్టకేలకు తీర్పు వెలువడటం ప్రాధాన్యత సంతరించుకుంది.
సిగరెట్తో కాల్చి..
హైదరాబాద్ పాతబస్తీలోని ఓ ప్రైవేటు పాఠశాలలో బాలుడిని లైంగికంగా వేధించిన ఆయాకు ఎట్టకేలకు శిక్ష ఖరారైంది. బార్కాస్‌ ప్రాంతంలోని ఓ ప్రైవేటు స్కూల్‌లో జ్యోతి అనే పాతికేళ్ల మహిళ.. 2017లో ఆయాగా చేరింది. ఆ ఏడాది నవంబర్ 20న బాధిత బాలుడు మూత్రశాలకు వెళ్లిన సమయంలో ఆ వెనుకే వెళ్లిన జ్యోతి... బాలుడి మర్మాంగాలను పట్టుకుని అసభ్యకరంగా ప్రవర్తించి ఇబ్బంది పెట్టింది. మళ్లీ అదే నెల 30న కూడా జ్యోతి అలాగే ప్రవర్తించి బాలున్ని వేధించింది. ఈ విషయాన్ని ఎవరికి చెప్పొద్దని బాలుని ఒంటిపై సిగరెట్తో కాల్చింది. శరీరంపై సిగరెట్ వాతను గమనించిన తండ్రి ఏమి జరిగిందని వాకబు చేశాడు. బాలుడు భయపడుతూ జరిగిందంతా తల్లిదండ్రులకు వివరించాడు.