‘‘మీరు కొవిడ్‌ బాధితులా? ఇంట్లో ఆహారం సిద్ధం చేసుకోలేక ఇబ్బంది పడుతున్నారా? అయితే మాకు ఒక్క కాల్‌ చేయండి. మేమే మీ ఇంటికి తీసుకొచ్చి ఇస్తాం’’ అంటూ ఈ సంక్షోభ సమయంలో అండగా నిలుస్తోంది నారీసేన గ్లోబల్‌ ఉమెన్‌ ఫోరం. ఆంధ్రప్రదేశ్, తెలంగాణ రాష్ట్రాలతో పాటు బెంగళూరు, చెన్నైల్లోని వివిధ ప్రాంతాల్లో ఈ సంస్థ సేవలందిస్తోంది. ఈ బృందంలో ఉన్నవారంతా మహిళలే. వారిలో వైద్యులు, ఔత్సాహిక పారిశ్రామిక వేత్తలు, విభిన్న రంగాలకు చెందిన ప్రముఖులు ఉన్నారు.
బాధితుల నుంచి వచ్చే ఫోన్లు ప్రతీరోజూ స్వీకరించటం, ఆ సంఖ్యకు అనుగుణంగా ఇంట్లోనే ఆహారాన్ని సిద్ధం చేయటం, వాలంటీర్లు, డెలివరీ బాయ్‌ల ద్వారా పంపిణీ చేయించటం వంటి బాధ్యతలన్నీ ఎక్కడికక్కడ వారే చూస్తుంటారు. ఈ సంస్థ వ్యవస్థాపకురాలు లతా చౌదరి బొట్ల అన్ని ప్రాంతాల్లో జరిగే కార్యక్రమాల్నీ సమన్వయం చేస్తున్నారు. ఏప్రిల్‌ 29న ఈ ఆహార పంపిణీ కార్యక్రమాన్ని ప్రారంభించారు. ప్రస్తుతం ఆంధ్రప్రదేశ్‌లోని విశాఖపట్నం, గుంటూరు, తిరుపతి, కాకినాడ, శ్రీకాకుళం నగరాల్లో రోజుకు 400 మంది కొవిడ్‌ బాధితులకు ఆహారాన్ని అందిస్తున్నారు.
ఇప్పటివరకూ మొత్తం 6-7 వేల మంది వీరి సేవల్ని వినియోగించుకున్నారు. నారీసేన గ్లోబల్‌ ఉమెన్‌ ఫోరం సంస్థలో ప్రపంచవ్యాప్తంగా 8 వేల మంది సభ్యులున్నారు. ఆయా నగరాల్లో ఉన్న సభ్యులు స్థానికంగా ఈ ఆహార పంపిణీ ఏర్పాట్లు చేస్తున్నారు. ఆహారం పంపిణీ పూర్తయిన తర్వాత దాని నాణ్యతపై ప్రతిరోజూ బాధితుల నుంచి అభిప్రాయాలు తీసుకుంటారు. వాటికనుగుణంగా ఎప్పటికప్పుడు అవసరమైన మార్పులు చేసుకుంటున్నారు. ఈ సంస్థ నుంచి సేవలు పొందేందుకు ఈ కింది నెంబర్లలో సంప్రదించొచ్చు.
రూ.2 లక్షలతో మొదలుపెట్టి.. ఎందరికో ‘‘మార్గం’’ చూపి
అనాథలు, అభాగ్యులు, నిరాశ్రయులు, చిన్న చిన్న పనులు చేసుకుంటూ గడిపేవారు ఇలా అనేక మంది కరోనా వేళ విజయవాడ నగరంలోని రోడ్లు, ఫుట్‌పాత్‌లపై ఆకలితో అలమటిస్తూ ఉండటం చూసి ఆమె చలించిపోయారు. వారికి ఏమైనా చేయగలనా? అని ఆలోచించి ఆమె వద్దనున్న సొమ్ములో రూ.2 లక్షలు తీసి.. వారికి ఆహారం పంపిణీ చేయటం ప్రారంభించారు. ఇలా నెల కిందట ప్రారంభించిన సేవల్ని దాతల సహకారంతో మరింత విస్తరించారు మార్గం ఫౌండేషన్‌ వ్యవస్థాపకురాలు అడ్డగళ్ల లక్ష్మీ అన్నపూర్ణ. విజయవాడలో రోడ్లపక్కన నిరాశ్రయులుగా ఉంటున్న 250-300 మందికి రోజూ రాత్రిపూట ఆహార పొట్లాలు అందిస్తున్నారు.
అలాగే ఎవరైనా కొవిడ్‌ బారిన పడి.. ఇంట్లో ఆహారం సిద్ధం చేసుకోలేని పరిస్థితుల్లో ఉంటే.. రోజూ మధ్యాహ్నం పూట వారి ఇంటికి తీసుకెళ్లి ఆహారాన్ని అందిస్తారు. ఇలా విజయవాడ నగరంలో రోజుకు 200-220 మంది కొవిడ్‌ బాధితులకు ఆహారాన్ని పంపిణీ చేస్తున్నారు. ఈ కార్యక్రమాన్ని గత 15 రోజులుగా నిర్వహిస్తున్నారు. మార్గం ఫౌండేషన్‌ పేరిట ఇన్‌స్టాగ్రామ్‌లో ఓ ప్రొఫైల్‌ సిద్ధం చేశారు. కొవిడ్‌ బాధితులు ఎవరైనా సరే వారికి ఆసుపత్రుల్లో పడకలు, ఆక్సిజన్‌, మందులు తదితర అవసరాలపై అందులో సంప్రదిస్తే.. అవసరమైన ఏర్పాట్లు చేస్తున్నారు. దీని కోసం వాలంటీర్ల బృందాన్ని సిద్ధం చేశారు. అర్ధరాత్రి 2 గంటల వరకూ వీరు పనిచేస్తుంటారు. ఇప్పటివరకూ ఇలా 700 మందికి సేవలందించారు. విజయవాడలో ఉన్నవారు మార్గం ఫౌండేషన్‌ ప్రతినిధుల్ని కింది నంబర్‌లో సంప్రదించొచ్చు.
ప్రాణవాయు దాతలు
కొవిడ్‌ బాధితుల కోసం రాష్ట్ర వ్యాప్తంగా పలు ప్రాంతాల్లో అనేక రకాల సేవలందిస్తోంది జమాతే ఇస్లామీ హింద్‌ సంస్థ. కొవిడ్‌ రెండో దశలో ఆక్సిజన్‌ అందక ఎంతో మంది ప్రాణాలు కోల్పోయారు. అలాంటి పరిస్థితి తలెత్తకుండా కొందరి ప్రాణాలనైనా కాపాడాలనే ఉద్దేశంతో 400 ఆక్సిజన్‌ సిలిండర్లను సమకూర్చుకుంది. అత్యవసరమైన వారు తమను సంప్రదిస్తే వాటిని అందిస్తోంది. ఇప్పటివరకూ దాదాపు 5 వేల మంది ఈ సేవలు పొందారు. ఇంట్లో ఉంటూ చికిత్స తీసుకోవాలనుకునేవారి కోసం ఆన్‌లైన్‌ వైద్యసేవల్ని అందిస్తోంది. దీని కోసం పలువురు వైద్యులతో ఓ బృందాన్ని ఏర్పాటు చేసింది.
రాష్ట్ర వ్యాప్తంగా 12 అంబులెన్సులు సిద్ధం చేసి అవసరమైన వారిని ఆసుపత్రికి తీసుకెళ్లటం, కోలుకున్న వారిని ఇంటికి చేర్చటం కోసం వినియోగిస్తోంది. విజయవాడ సహా పలు ప్రాంతాల్లోని కొవిడ్‌ ఆసుపత్రుల వద్ద ఉండే బాధితుల కుటుంబ సభ్యులు, బంధువులకు ప్రతిరోజూ ఉచితంగా ఆహారం అందిస్తున్నారు. ఒక్క విజయవాడ ఆసుపత్రి వద్దే రోజుకు 500 మందికి భోజనాలు పెడుతున్నారు. కొవిడ్‌ మృతులకు అంతిమ సంస్కారాలు నిర్వహించేందుకు ఎవరూ ముందుకురాకపోతే.. ఈ సంస్థ ప్రతినిధులే దగ్గరుండి ఆ కార్యక్రమాల్ని నిర్వహిస్తున్నారు. రాష్ట్ర స్థాయిలో వీరి సాయం కోసం ఈ కింది నెంబర్లలో సంప్రదించొచ్చు.