ప్రభుత్వ అధికారుల కోర్టు ధిక్కరణ చర్యలపై హైకోర్టు ఆగ్రహం వ్యక్తం చేసింది. అధికారులు కోర్టు ఆదేశాలకు తగిన గౌరవం ఇవ్వడం లేదని ప్రధాన న్యాయమూర్తి జస్టిస్ హిమా కోహ్లీ, జస్టిస్ విజయ్ సేన్ రెడ్డి ధర్మాసనం అసహనం వ్యక్తం చేసింది. కోర్టు ధిక్కరణ శిక్ష పడితే.. అప్పీల్ చేస్తే సరిపోతుందని భావిస్తున్నారని హైకోర్టు ఆక్షేపించింది. కోర్టు ధిక్కరణ కేసులకే ఇద్దరు ముగ్గురు జడ్జీలను పెట్టాల్సి వచ్చేలా ఉందని ధర్మాసనం వ్యాఖ్యానించింది. ఆదేశాలను అధికారులు తేలిగ్గా తీసుకుంటే.. కోర్టు తీవ్రంగా పరిగణించాల్సి ఉంటుందని ధర్మాసనం హెచ్చరించింది.
సామాజిక సేవ చేయాలి..
సామాజిక సేవ చేయాలని నల్గొండ కలెక్టర్ ప్రశాంత్ జీవన్ పాటిల్ను హైకోర్టు ఆదేశించింది. రైస్మిల్లుకు ధాన్యం సరఫరా చేయాలన్న మధ్యంతర ఉత్తర్వులను అమలు చేయనందుకు ప్రశాంత్ జీవన్ పాటిల్, అప్పటి జిల్లా పౌర సరఫరాల అధికారి సంధ్యారాణికి సింగిల్ జడ్జి 2 వేల రూపాయల జరిమానా విధించారు. సింగిల్ జడ్జి తీర్పును కొట్టివేయాలని కోరుతూ పాటిల్, సంధ్యారాణి దాఖలు చేసిన అప్పీలుపై ప్రధాన న్యాయమూర్తి జస్టిస్ హిమా కోహ్లీ, జస్టిస్ విజయ్ సేన్ రెడ్డి ధర్మాసనం విచారణ చేపట్టింది. సామాజిక సేవ చేస్తే కోర్టు ధిక్కరణ శిక్ష రద్దు చేస్తామని గత విచారణలో హైకోర్టు ప్రతిపాదించింది. విచారణకు హాజరైన కలెక్టర్ .. ఓ ప్రభుత్వ పాఠశాలలో సుమారు 6వేల మంది బాలికలను చేర్పించినట్టు తెలిపారు. అది కలెక్టర్‌గా బాధ్యతే కానీ... వ్యక్తిగత సామాజిక సేవ ఎలా అవుతుందని ధర్మాసనం ప్రశ్నించింది. నల్గొండలోని అనాథాశ్రమంలో వారానికి 2 గంటల పాటు ఆరు నెలలు సేవ చేయాలని కలెక్టర్ను ఆదేశించింది. సేవ చేసినట్లు జిల్లా న్యాయమూర్తితో ధ్రువీకరణ పత్రం తీసుకొని రావాలని స్పష్టంచేసింది.