రాష్ట్ర వ్యాప్తంగా గత కొద్ది రోజులుగా భారీగా వర్షాలు కురుస్తున్నాయి. రెండ్రోజులుగా ఎడతెరిపిలేని వర్షాలతో పలు వాగులు, వంకలు పొంగి ప్రవహిస్తున్నాయి. జిల్లాల్లో చెరువులు పూర్తిగా నిండిపోయాయి. రోడ్లపై నీరు ఉద్ధృతంగా ప్రవహిస్తోంది. కడప జిల్లా వల్లూరు మండలం గోటూరు వద్ద జింకలవంక వాగు భారీ వరదతో పారుతోంది. వంతెనను తాకుతూ వరద నీరు ప్రవహిస్తోంది. రోడ్డు దాటే క్రమంలో కొట్టుకుపోతున్న ఓ ద్విచక్రవాహనదారుడిని స్థానికులు రక్షించారు.
కుంగిన వంతెన...
కడప జిల్లా కమలాపురం మండలం గొల్లపల్లి వద్ద వంతెన కుంగిపోయింది. ఫలితంగా వాహనాల రాకపోకలు నిలిచిపోయాయి. శుక్రవారం రాత్రి కురిసిన వర్షానికి వంతెన కుంగినట్లు స్థానికులు తెలిపారు.