విజయవాడ రమేష్ ఆస్పత్రి ఆధ్వర్యాన స్వర్ణ ప్యాలెస్‌లో నిర్వహించిన కొవిడ్ కేర్ సెంటర్‌లో... ఆగస్టు 9న అగ్నిప్రమాదం జరిగింది. ఈ ఘటనలో 10 మంది మృతి చెందగా, పలువురు గాయపడ్డారు. దీనిపై రమేష్ ఆస్పత్రి ఛైర్మన్ సీతారామ్మోహనరావు, ఎండీ రమేష్ బాబులపై పోలీసులు కేసు నమోదు చేశారు. దీన్ని సవాలు చేస్తూ వారిద్దరూ హైకోర్టును ఆశ్రయించారు. విచారణ చేసిన హైకోర్టు... రమేష్‌బాబు, సీతారామ్మోహన్‌రావుపై తదుపరి చర్యలు తాత్కాలికంగా నిలిపివేయాలంటూ మధ్యంతర ఆదేశాలు జారీ చేసింది.
ప్రమాద ఘటనలో ప్రభుత్వ నిర్లక్ష్యం కూడా ఉందని హైకోర్టు అప్పట్లో వ్యాఖ్యానించింది. హైకోర్టు మధ్యంతర ఆదేశాలను సవాలు చేస్తూ రాష్ట్ర ప్రభుత్వం ఈ నెల 3న దేశ సర్వోన్నత న్యాయస్థానాన్ని ఆశ్రయించింది. స్వర్ణ ప్యాలెస్ అగ్నిప్రమాద ఘటనపై విచారణకు హైకోర్టు ఆదేశాలు అడ్డుగా ఉన్నాయని... స్టే ఇవ్వాలని కోరింది. అగ్ని ప్రమాదంపై విచారణ ముందుకు సాగితేనే నిజనిజాలు బయటకు వస్తాయని... ప్రాథమిక దశలోనే చర్యలు నిలిపివేయాలని ఆదేశాలు ఇవ్వడం సరికాదని పిటిషన్‌లో పేర్కొంది.