రాజధాని అమరావతికి సంబంధించిన పిటీషన్లపై సోమవారం హైకోర్టులో విచారణ జరిగింది. ముఖ్యంగా అనుబంధ పిటీషన్లపై జరపనున్న విచారణపై న్యాయవాదులను వివరాలు కోరింది ధర్మాసనం. ఇప్పటివరకు రాజధానికి సంబంధించి 229 అనుబంధ పిటీషన్లు దాఖలైనట్లు ధర్మాసనం తెలిపింది . దీంట్లో మధ్యంతర ఉత్తర్వులకు సంబంధించిన పిటీషన్లను ముందుగా విచారించనున్నట్లు త్రిసభ్య ధర్మాసనం తెలిపింది. మంగళవారం నుంచి రోజు వారీ విచారణ జరపనున్నారు . ముందుగా రాజధానిపై దాఖలైన అనుబంధ వ్యాజ్యాలను అంశాల వారీగా విభజించనున్నారు.
మంగళవారం నుంచి ఉదయం 10.30 నుంచి మధ్యాహ్నం వరకు రాజధాని అంశాలకు సంబంధించిన వ్యాజ్యాలను విచారించనున్నట్లు త్రిసభ్య ధర్మాసనం తెలిపింది . అనుబంధ పిటీషన్లపై విచారణ ముగిసిన తర్వాత ..ప్రధాన పిటీషన్లను విచారించనున్నారు. ప్రస్తుతం ఆన్ లైన్ ద్వారానే విచారణ కొనసాగుతుందని ధర్మాసనం తెలిపింది .
అంశాలవారీగా విచారణ....
రాజధాని నుంచి కార్యాలయాల తరలింపు , సీఆర్డీఏ రద్దు చట్టం , మూడు రాజధానుల ఏర్పాటు చేస్తూ చేసిన చట్టం రాజ్యాంగ విరుద్ధమంటూ దాఖలైన పిటీషన్లు , ఆర్ 5 జోన్ , శాసనమండలి లో సీఆర్డీఏ రద్దు ,రాజధాని వికేంద్రీకరణ బిల్లులు పెండింగ్ లో ఉండగా రెండో సారి బిల్లు ప్రవేశ పెట్టి ఆమోదించటం విశాఖలో గెస్ట్ హౌస్ నిర్మాణం తదితర అంశాలపై దాఖలైన పిటీషన్లపై విచారణ జరిపారు . విశాఖలో 30 ఎకరాల్లో గెస్ట్ హౌస్ నిర్మాణంపై దాఖలు చేసిన పిటీషన్ లో సీఎస్ కౌంటర్ దాఖలు చేశారు . అయితే ఆ కౌంటర్ లో గెస్ట్ హౌస్ కు సంబంధించి పూర్తి వివరాలు సమర్పించలేదని పిటీషనర్ తరపు న్యాయవాది ధర్మాసనం దృష్టికి తీసుకువచ్చారు . ప్రభుత్వం మరో రెండు చోట్ల గెస్ట్ హౌస్ నిర్మాణాలు చేపడుతుందని వాటికి .. విశాఖలో జరుగుతున్న గెస్ట్ హౌస్ నిర్మాణానికి చాలా వ్యత్యాసం ఉన్నదని పిటీషన్ తరపు న్యాయవాది వాదనలు వినిపించారు . దీనికి ఏజీ స్పందిస్తూ.... విశాఖకు మిగతా నగరాలకు వ్యత్యాసం ఉన్నదన్నారు . విశాఖకు అధిక సంఖ్యలో గెస్ట్ లు వస్తారని తెలిపారు . మరోవైపు ఇళ్ల పట్టాలకు సంబంధించిన పిటీషన్లను కూడా త్వరగా విచారించాలని ఏజీ ధర్మాసనాన్ని కోరారు . దీనికి స్పందించిన ధర్మాసనం ప్రయార్టీ వారీగా పిటీషన్లను విచారిస్తామని తెలిపింది .
అనుబంధ పిటీషన్లపై ఇరువర్గాల న్యాయవాదులందరి అభిప్రాయాలను ధర్మాసనం కోరింది . రాజధాని అంశానికి సంబంధించని పిటీషన్లను జాబితా నుంచి వేరు చేశారు.
ఇదీ చదవండి:పోలీసుల ఉదాసీనత వల్లే రాజ్యాంగ ఉల్లంఘనలు: చంద్రబాబు
