పుర, నగరపాలక సంస్థల్లో పొరుగు సేవల కింద పని చేస్తున్న పారిశుద్ధ్య కార్మికులకు వేతనాలు కోసం అప్పట్లో పోరాటం చేశారు. దిగొచ్చిన ప్రభుత్వం రూ. 3 వేలు పెంచుతున్నట్లు ప్రకటించింది. దీంతో గతంలో రూ. 12 వేలుగా ఉన్న వేతనాన్ని జనవరి నుంచి రూ. 15 వేలు చేస్తున్నట్లు తెలిపింది. జీతం పెరిగిందని సంబరపడిన పొరుగుసేవల పారిశుద్ధ్య కార్మికులకు వైకాపా ప్రభుత్వం మరో రూపంలో షాకిచ్చింది. 2019 ఆగస్టు నుంచి కార్మికులకు జీతంతో పాటు నెలకు రూ. 6 వేలు చొప్పున అదనంగా ఇచ్చిన వృత్తిపరమైన మెడికల్‌ అలవెన్స్‌ని నిలిపి వేసింది. జీతం పెరిగినప్పటి నుంచి మెడికల్‌ అలవెన్స్‌ కార్మికుల బ్యాంకు ఖాతాల్లో జమ కావడం లేదు. రూ. 3 వేలు జీతం పెంచి.. రూ. 6 వేల మెడికల్‌ అలవెన్స్‌ ఆపేసింది.
పట్టణ స్థానిక సంస్థల్లో దాదాపు 33 వేల మంది పారిశుద్ధ్య కార్మికులు పని చేస్తున్నారు. రహదారులు, కాలువలు శుభ్రం చేయడంతో పాటు ఇళ్లు, దుకాణాల నుంచి వీరు చెత్త సేకరిస్తుంటారు. వైకాపాఅధికారంలోకి వచ్చాక నెలకు రూ. 12 వేల వేతనంతోపాటు ‘అక్యుపేషనల్‌ మెడికల్‌ అలవెన్స్‌’ కింద ఒక్కో కార్మికుడికి నెలకు రూ. 6 వేలు చొప్పున అదనంగా చెల్లించాలని నిర్ణయించింది. పుర, నగరపాలక సంస్థలతో సంబంధం లేకుండా రాష్ట్ర ప్రభుత్వ నిధుల నుంచి ఈ మొత్తాలు చెల్లించేలా అప్పట్లో ఏర్పాట్లు చేశారు.