దేవాదాయ శాఖకు చెందిన నిధుల్ని వైఎస్ఆర్ వాహన మిత్ర పథకానికి మళ్లించ లేదని రాష్ట్ర ప్రభుత్వం హైకోర్టుకు నివేదించింది. ఈ మేరకు కౌంటర్ దాఖలు చేసింది. పిటిషనర్ తరఫు న్యాయవాది గోపాలకృష్ణ కళానిధి వాదనలు వినిపిస్తూ, ప్రభుత్వం వేసిన కౌంటర్‌ను పరిశీలించానని, అందులోని వివరాలతో సంతృప్తి చెందానన్నారు. దేవాదాయ శాఖ నిధులను మళ్లించడం లేదని, బ్రాహ్మణ సంక్షేమ కార్పోరేషన్కు ప్రభుత్వం బడ్జెట్ ద్వారా కేటాయించిన నిధులను కేవలం బ్రాహ్మణుల వాహన మిత్ర పథకానికి వినియోగిస్తున్నట్లు కౌంటర్లో పేర్కొన్నారన్నారు.
ఈ నేపథ్యంలో వ్యాజ్యంపై విచారణ అవసరం లేదన్నారు. ఆ వివరాల్ని నమోదు చేసిన హైకోర్టు ప్రధాన న్యాయమూర్తి జస్టిస్ ఏకే గోస్వామి, జస్టిస్ ఎన్.జయసూర్యతో కూడిన ధర్మాసనం పిల్పై విచారణను మూసివేసింది. వైఎస్ఆర్ వాహన మిత్ర పథకానికి దేవాదాయ శాఖ నిధులు రూ .49లక్షలు మళ్లింపు నిమిత్తం 2021 జూన్ 15 న దేవాదాయ రెవెన్యూ శాఖ జీవో 334 జారీచేసిందని, ఆ జీవోను చట్ట విరుద్ధమైనదిగా ప్రకటించాలని తిరుపతికి చెందిన సామాజిక కార్యకర్త, భాజపా నేత జి.భానుప్రకాశ్ రెడ్డి హైకోర్టులో పిల్ వేశారు.