ముఖ్యమంత్రి వైఎస్ జగన్తో అదానీ గ్రూప్ ఆఫ్ ఇండస్ట్రీస్ అధినేత గౌతమ్ అదానీ భేటీ అయ్యారు(gautam adani met cm ys jagan ). ఇవాళ మధ్యాహ్నం ప్రత్యేక విమానంలో అహ్మదాబాద్ నుంచి గన్నవరం వచ్చిన ఆయన కొద్దిసేపు విజయవాడలో బస చేసి అనంతరం సీఎంతో సమావేశమయ్యారు. కుటుంబ సభ్యులతో కలిసి వచ్చిన అదానీ రెండు గంటలపాటు సీఎంతో రాష్ట్రంలో పెట్టుబడులకు సంబంధించిన అంశాలపై చర్చించినట్టు తెలుస్తోంది.
విశాఖలో ఏర్పాటు చేయనున్న అదానీ డేటా సెంటర్ అంశంతో పాటు గంగవరం పోర్టు ప్రస్తుతం అదానీ గ్రూప్ సంస్థల పరిధిలోకి వెళ్లటంతో సదరు అంశాలపై చర్చించినట్టు సమాచారం. ఫలితంగా కేంద్ర ప్రభుత్వ రంగ సంస్థ సెకీ (Solar Energy Corporation of India)నుంచి కొనుగోలు చేయనున్న సౌర విద్యుత్ అదానీ గ్రూప్ సరఫరా చేయనున్న నేపథ్యంలో దానిపై కూడా ఇరువురి మధ్యా చర్చ జరిగినట్టు తెలుస్తోంది. అనంతరం గౌతమ్ అదానీ కుటుంబ సభ్యులతో కలిసి ప్రత్యేక విమనానంలో బయల్దేరి వెళ్లారు.