వ్యవసాయానికి ఉచిత విద్యుత్ అందించడానికి ప్రభుత్వం ప్రతిపాదించిన సౌర విద్యుత్ ప్రాజెక్టుల ఏర్పాటుకు సంబంధించిన టెండర్లను న్యాయ సమీక్ష కమిటీ బుధవారం ఆమోదించింది. టెండర్ల ప్రక్రియ నిర్వహణలో తగిన జాగ్రత్తలు తీసుకోవాలంది. ప్రతిపాదించిన 10వేల మెగావాట్ల ప్రాజెక్టుల్లో.. మొదటి దశలో 6,400 మెగావాట్ల ప్రాజెక్టుల ఏర్పాటుకు టెండర్ల ప్రక్రియను ఏపీ గ్రీన్‌ ఎనర్జీ కార్పొరేషన్‌ లిమిటెడ్‌ (ఏపీజీఈఎల్‌) చేపట్టింది. టెండరు నిబంధనలను న్యాయ సమీక్షకు పంపింది. వాటిపై వివిధ సంస్థలు, వ్యక్తుల నుంచి వచ్చిన అభ్యంతరాలను పరిశీలించిన అనంతరం టెండర్ల ప్రక్రియను నిర్వహించటానికి కమిటీ పలు సూచనలు, వ్యాఖ్యలు చేసింది.
* రాష్ట్రంలో అవసరాలకు మించి విద్యుత్ ప్రాజెక్టులున్నాయని, ఇలాంటి సమయంలో కొత్తగా 10వేల మెగావాట్ల సోలార్‌ ప్రాజెక్టులు ఎందుకని వివిధ సంస్థలు కమిటీకి ఫిర్యాదు చేశాయి. ‘ప్రస్తుతం డిస్కంలు కుదుర్చుకున్న పీపీఏల ప్రకారమే విద్యుత్‌ను కొనాల్సి ఉంది. అలాంటప్పుడు అదనంగా వచ్చే విద్యుత్‌ను ఎక్కడ వినియోగిస్తారు? డిస్కంల దగ్గర మిగిలిపోయే విద్యుత్‌ను సర్దుబాటు చేయటానికి ఎలాంటి విధానాలు ఉన్నాయి?’ అని అధికారులను కమిటీ ప్రశ్నించింది. కొత్త ప్రాజెక్టులను పూర్తి చేయటానికి రెండేళ్లు పడుతుందని, ఈలోగా కొన్ని పాత పీపీఏల కాల వ్యవధి ముగుస్తుందని, ఏటా కనీసం 10% విద్యుత్ వినియోగ డిమాండ్ పెరుగుతుందని అధికారులు వివరించారు.
* కనీసం 300 మెగావాట్ల ప్రాజెక్టు ఏర్పాటు చేసే సంస్థలకే టెండరులో పాల్గొనే అవకాశం కల్పించాలని నిబంధనల్లో అధికారులు పేర్కొన్నారు. దీని ప్రకారం భారీ సౌర విద్యుత్ ప్రాజెక్టులు ఏర్పాటు చేసే సంస్థలకే అవకాశం ఉంటుంది కదా? అని కమిటీ ప్రశ్నించింది.