రాష్ట్రంలో ప్రబలుతున్న ప్రాణాంతక బ్లాక్ఫంగస్ ప్రజలను భయాందోళనలోకి నెట్టింది. ఒకవైపు కోవిడ్‌తో బాధపడి చికిత్స పొందేవారు కోలుకుంటున్నారని ప్రభుత్వం చెబుతుంటే... మరోవైపు బ్లాక్‌ఫంగస్‌తో బాధపడుతున్న రోగుల సంఖ్య క్రమంగా పెరగడం ఇబ్బందికరంగా మారింది. ఇప్పటి వరకు అధికారికంగా 10కి పైగా బ్లాక్ ఫంగస్ కేసులు నమోదు అయ్యాయి. ఇందులో ఐదు మరణాలు చోటుచేసుకున్నాయి.
కృష్ణా, ప్రకాశం, కడప జిల్లాలకు చెందిన ముగ్గురు మరణించిన వారిలో ఉన్నారు. ప్రకాశం జిల్లాకు చెందిన ఇద్దరు హైదరాబాద్, చెన్నై ఆస్పత్రుల్లో చికిత్స పొందుతూ మృతిచెందారు. ప్రైవేట్ ఆస్పత్రులకు వచ్చే బ్లాక్ ఫంగస్ కేసుల సంఖ్య పెద్ద మొత్తంలో ఉంటుంది. పరిస్థితులను బట్టి చూస్తుంటే.. గ్రామీణ ప్రాంతాల ప్రజలు బ్లాక్ ఫంగస్ గుప్పిట్లో చిక్కుకున్నట్లుగా కన్పిస్తోందని వైద్య నిపుణులు చెబుతున్నారు.
బ్లాక్ఫంగస్ కేసులు క్రమంగా బయటపడుతుండటంతో బాధితుల సంఖ్య ఇంకా పెరిగే అవకాశం ఉందన్న అభిప్రాయాన్ని వైద్య వర్గాలు వ్యక్తం చేస్తున్నాయి. చాలా కేసుల్లో కొవిడ్‌ బారిన పడి కోలుకున్న తర్వాత ముక్కు, చెవి గొంతు ద్వారా సంక్రమించే ఈ ఫంగస్ చివరకు వ్యక్తులకు ప్రాణంతకమవుతోంది. కరోనా తగ్గందనుకున్న వారిలో కన్ను, దవడ వాపు వంటి లక్షణాలు కొందరిలో దంత సమస్యలు వస్తున్నాయి.
బ్లాక్ ఫంగస్ గురించి తెలియని వారు హోం ఐసోలేషన్‌తో ఇంటి వద్ద చికిత్స పొందున్నారు. కాస్తంత వైద్య విషయాల పరిచయం ఉన్నవారు వైద్యులను ఆశ్రయిస్తున్నారు. తాజాగా బ్లాక్ఫంగస్ సమస్యతో మరణిస్తున్న వారికి సంబంధించిన సమాచారం ప్రచారం ఈఎన్‌టీ సమస్యలు ఉన్న వారు తమకు బ్లాక్ఫంగస్ ఉందన్న భయంతో ఆసుపత్రులకు బారులు తీరుతున్నారు.