తమిళనాడు రాష్ట్రం చెన్నై సమీపంలో సముద్ర జలాల్లో వేట సాగిస్తూ ఈ నెల 16న గల్లంతైన శ్రీకాకుళం జిల్లాకు చెందిన 8 మంది వలస మత్స్యకారులు ఎట్టకేలకు తీరానికి చేరుకున్నారు. వీరి ఆచూకీ తెలిసినా ఇంతవరకు ఒడ్డుకు చేరకపోవడంతో కుటుంబ సభ్యుల్లో ఆందోళన, ఉత్కంఠ రేగుతూనే ఉంది. చివరికి శుక్రవారం రాత్రి తొమ్మిది గంటల సమయంలో ప్రత్యేక బోటులో వీరంతా చెన్నైకి చేరుకున్నారు. రెండు రాష్ట్రాల్లో కలవరం రేపిన ఈ ఘటన అసలు ఎలా జరిగింది. బయట ప్రపంచంతో సంబంధాలు తెగిపోయిన నాలుగు రోజులు ఎలా ఉన్నారు. ప్రాణాలను ఎలా కాపాడుకున్నారో వివరించారు. నడిసంద్రంలో బతుకు వేట ఎలా సాగిందో వారి మాటల్లోనే.
నడిసంద్రంలో ప్రశాంతంగా వేట సాగిస్తున్నాం. ఈనెల 16వ తేదీ ఉదయం డ్రైవరు వచ్చి బోటు కదల్లేదని చెప్పేసరికి ఆందోళనకు గురయ్యాం. వెళ్లి పరిశీలించగా కీలకమైన పంకా తెగిపోయి కనిపించింది. సాంకేతిక ఇబ్బందుల వల్ల ఇక ప్రయాణం సాగించలేమని తెలిసింది. అప్పటికే అండమాన్‌-చెన్నై మధ్య భాగంలో ఉన్నాం. కదల్లేని స్థితిలో ఉన్న బోటులోకి సముద్ర జలాలు వస్తున్నాయి.
ఈ విషయం చెన్నై తీరంలో ఉన్న యజమానికి చెప్పేలోగా వైర్‌లెస్‌ సెట్‌ కూడా పనిచేయడం మానేసింది.. అంతే నడిసంద్రంలో ప్రాణాలు నిలిచే పరిస్థితి కష్టమని భావించాం. గాలివాటుకు ఎటువైపు వెళ్తుందో తెలియడం లేదు. నీటిని బయటకు తోడుతూ భయాందోళనల మధ్య 15 గంటలు నరకయాతన అనుభవించాం.. ఏం చేయాలో పాలుపోలేదు. ఎవరికీ సమాచారం ఇచ్చేందుకు అవకాశం లేదు.. ఒకరిద్దరు వైర్‌లెస్‌ సెట్‌తో కుస్తీలు పడుతూనే ఉన్నారు. ఎందుకంటే సమీపంలో వేట సాగించే వారికి సమాచారం వెళ్లే అవకాశం ఉంటుందని.