Jobs Recruitment in Telangana:తెలంగాణ రాష్ట్రంలో ఉద్యోగ నియామక ప్రక్రియలో ముందడుగు పడింది. 30,453 పోస్టుల భర్తీకి తెలంగాణ రాష్ట్ర ఆర్థిక శాఖ ఆమోదం తెలిపింది. శాసనసభలో సీఎం ప్రకటన మేరకు ఆర్థిక శాఖ ఉత్తర్వులు జారీ చేసింది. గ్రూప్-1, హోంశాఖ, జైళ్లు, రవాణా, వైద్య, ఆరోగ్య శాఖల్లో భర్తీకి అనుమతి ఇచ్చింది. ఉపాధ్యాయ అర్హత పరీక్ష (టెట్) నిర్వహణకు అంగీకరించిన ఆర్థికశాఖ.. ఇందుకు అనుగుణంగా మార్గదర్శకాలు జారీ చేసింది. సంబంధిత నియామకసంస్థలు భర్తీ ప్రక్రియ చేపట్టనున్నాయి.
ఉద్యోగాల భర్తీకి సంబంధించి శాసనసభ వేదికగా ముఖ్యమంత్రి కేసీఆర్‌ కీలక ప్రకటన చేసిన విషయం తెలిసిందే. సీఎం ప్రకటనకు అనుగుణంగా ఆర్థిక మంత్రి హరీశ్‌రావు, అధికారులు ఇందుకు సంబంధించిన కసరత్తును పూర్తి చేశారు. ఇటీవల మంత్రివర్గ ఉపసంఘం కూడా సమావేశమై తదుపరి ప్రక్రియపై దృష్టి సారించింది. ముఖ్యమంత్రి ప్రకటించిన 80,039 ఉద్యోగాలకు గాను ఇవాళ తొలి విడతగా 30,453 ఉద్యోగాల భర్తీకి అనుమతిస్తూ ఆర్థికశాఖ ఉత్తర్వులు జారీ చేసింది.