Fake Doctor Arrested: వైద్యుడి గెటప్లో నేరుగా ఆస్పత్రి ఐసీయూలోకి ప్రవేశించి.. రోగి బంధువుల నుంచి డబ్బులు లాగుదామని ప్రయత్నించి చివరకు జైల్లో ఊచలు లెక్కపెడుతున్నాడు ఓ యువకుడు. తెలంగాణ రాజధాని హైదరాబాద్లోని ఓ ప్రైవేట్ ఆస్పత్రిలో జరిగిన ఈ ఘటన ఆలస్యంగా వెలుగులోకి వచ్చింది. వివరాలను పంజాగుట్ట పోలీసులు వెల్లడించారు.
అనారోగ్యంతో బాధపడుతున్న ఓ వ్యక్తిని ఈ నెల 16న బంజారాహిల్స్‌లోని ఓ ప్రైవేట్ ఆస్పత్రిలో చేర్చించారు. రోగికి ఐసీయూలో చికిత్స అందిస్తున్నారు. అదే రోజు గుర్తుతెలియని వ్యక్తి వైద్యుడి వేషధారణతో ఐసీయూలోకి వెళ్లాడు. రోగి కేసు షీట్‌ను పరిశీలించి రోగి సహాయకుడి ఫోన్‌ నంబరు తీసుకున్నాడు. వాళ్లకు ఫోన్‌ చేసి అత్యవసర శస్త్రచికిత్స చేయాలని, తక్షణం రూ.50 వేలు పంపించాలని చెప్పాడు.