New Pensions: స్వాతంత్య్ర వజ్రోత్సవాల సందర్భంగా తెలంగాణ ప్రభుత్వం రాష్ట్రంలో 57 ఏళ్లు నిండిన వారికి పింఛన్లు మంజూరు చేసింది. వీరితోపాటు పెండింగులో ఉన్న పింఛన్ల దరఖాస్తులను కూడా పరిష్కరించింది. ఈ మేరకు జిల్లా కలెక్టర్లు, గ్రామీణాభివృద్ధి పీడీలకు ప్రభుత్వం నుంచి ప్రత్యేక ఆదేశాలు అందాయి. పింఛన్ల కోసం ఆన్‌లైన్లో వచ్చిన దరఖాస్తులను పరిశీలించిన ప్రభుత్వం.. దరఖాస్తుదారుల ఆధార్‌, ఓటరు కార్డులతో పాటు ప్రభుత్వం వద్ద ఉన్న సమాచారం ఆధారంగా అర్హులను ఎంపిక చేసింది. దీనికోసం తెలంగాణ టెక్నాలజీ సర్వీసెస్‌ సాంకేతిక పరిజ్ఞానాన్ని ఉపయోగించింది. దీని ఆధారంగా నకిలీ పింఛన్ల(డూప్లికేషన్ల)నూ తొలగించింది. అర్హులకు ప్రస్తుత ఆగస్టు నెలలో పింఛన్లు మంజూరు చేశామని, లబ్ధిదారులకు సెప్టెంబరు మొదటి వారంలో బ్యాంకు ఖాతాల్లో నగదు జమ అయ్యేలా చర్యలు తీసుకుంటున్నామని గ్రామీణాభివృద్ధి శాఖ వర్గాలు వెల్లడించాయి.
భారత స్వాతంత్య్ర వజ్రోత్సవాలను పురస్కరించుకుని ప్రభుత్వం సోమవారం ప్రతి జిల్లాలో కొందరు లబ్ధిదారుల్ని ఎంపిక చేసి, వారికి ‘ఆసరా బహుమానాలు’ పంపిణీ చేసింది. పింఛను మంజూరు పత్రం, గుర్తింపు కార్డు, స్థానిక ఎమ్మెల్యే/మంత్రి రాసిన లేఖను జత చేసి అందించింది. ప్రస్తుతం ఒక్కో జిల్లాలో వంద మందికి పింఛన్లు పంపిణీ చేసినట్లు సమాచారం. రాష్ట్రంలో ఇప్పటికే క్షేత్రస్థాయి పరిశీలన పూర్తయి, పెండింగ్‌లో ఉన్న దరఖాస్తులతో పాటు 57 ఏళ్లు నిండిన లబ్ధిదారులు దాదాపు 10 లక్షల మంది ఉన్నారు. వీరందరికీ ప్రభుత్వం తాజాగా ఆసరా పింఛన్లు మంజూరు చేసి ఆ వివరాలను జిల్లా గ్రామీణాభివృద్ధి ప్రాజెక్టు అధికారులు, జిల్లా అధికారులకు పంపించింది.