Agriculture Loans: ఆ విషయంలో వెనకబడిపోయిన తెలంగాణ..!

రైతుల పంట రుణాల ఖాతాల సంఖ్య, ఇస్తున్న రుణాల మొత్తం సొమ్మును ఇతర రాష్ట్రాలతో పోల్చి చూస్తే తెలంగాణలో చాలా తక్కువగా ఉంది. రుణమాఫీ పథకమే దీనికి ప్రధాన కారణమని తెలంగాణ వ్యవసాయశాఖ అధికారులు చెబుతున్నారు.

రైతులకు పంటరుణాల (Crop Loans) పంపిణీలో తెలంగాణ బాగా వెనుకబడింది. కేరళ, హరియాణా, పంజాబ్‌ వంటి చిన్న రాష్ట్రాలకన్నా చాలా తక్కువగా రైతులకు రుణాలిస్తున్నారు. 2019-20లో హరియాణాలో ఒక్కో రైతు పంట రుణ ఖాతాకు రూ.లక్షన్నర, పంజాబ్‌లో రూ. లక్షా 92 వేలు, కేరళలో రూ. 86,855 చొప్పున సగటున రుణాన్ని బ్యాంకులివ్వగా తెలంగాణలో రూ.70,950 ఇచ్చినట్లు కేంద్ర వ్యవసాయశాఖ తాజా నివేదిక (Report of the Central Department of Agriculture)లో వెల్లడించింది. పంట రుణ ఖాతాలు, సొమ్ము పంపిణీ సంఖ్యలను పరిశీలిస్తే తమిళనాడు, ఆంధ్రప్రదేశ్‌ వరసగా తొలి రెండు అగ్రస్థానాల్లో ఉన్నాయి. వాస్తవానికి దేశంలో అత్యధిక జనాభా 22 కోట్లమంది ఉత్తరప్రదేశ్‌లో ఉన్నారు.

రాష్ట్రాల్లో పంటరుణాల పంపిణి వివరాలు

కానీ.. అక్కడ రైతు రుణాల సంఖ్య 91.16 లక్షలే ఉండగా వారికిచ్చిన సొమ్ము రూ.74,368 కోట్లు మాత్రమే. ఉత్తర్‌ప్రదేశ్‌ జనాభాలో సగం కూడా లేని తమిళనాడులో యూపీకన్నా మరో 94 లక్షల ఖాతాలు అధికంగా ఉన్నాయి. తెలంగాణతో పోలిస్తే తమిళనాడులో మరో 3 రెట్లు అధికంగా సొమ్మును రుణాలుగా రైతులకు పంపిణీ చేశారు. బిహార్‌, పశ్చిమబెంగాల్‌ రాష్ట్రాల్లో జనాభా, రైతుల సంఖ్య ఎక్కువగా ఉన్నా రుణాల పంపిణీ చాలా తక్కువగా ఉంది.

రుణమాఫీ ప్రభావంతోనే..

తెలంగాణలో పంట రుణాల పంపిణీ తక్కువగా ఉండటానికి రుణమాఫీ పథకమే ప్రధాన కారణమని తెలంగాణ వ్యవసాయశాఖ అధికారులతో పాటు బ్యాంకర్లు చెబుతున్నారు. 2018 డిసెంబరు నాటికి రూ.లక్ష లోపు బాకీ ఉన్న రైతుల రుణాలన్నీ మాఫీ చేస్తామని తెలంగాణ ప్రభుత్వం ప్రకటించింది. ఇప్పటివరకూ అందులో రూ.25,000 లోపు రుణాలనే ప్రభుత్వం బ్యాంకులకు చెల్లించింది. పైగా ఇవి కూడా 2020 వానాకాలంలో ఇచ్చినవి. రైతులు కొత్త రుణాలు తీసుకోవాలంటే ముందుగా పాత బకాయిలు చెల్లించేయాల్సి ఉంటుంది.

కానీ.. రుణాలు మాఫీ అవుతాయనే ఉద్దేశంతో 2019-20లో రైతులు అటు పాతబాకీలూ కట్టలేదు.. ఇటు కొత్త రుణాలనూ తీసుకోలేదనేది బ్యాంకుల వాదన. అందువల్లనే ఇతర రాష్ట్రాలతో పోలిస్తే తెలంగాణలో రుణాల పంపిణీ చాలా తక్కువగా ఉన్నట్లు అంచనా. రూ.25,000కు పైన, రూ.లక్షలోపు బాకీ ఉన్న రైతుల రుణాలను మాఫీ చేయడానికి ఇంకా దాదాపు రూ. 27,000 కోట్లు బ్యాంకులకు ప్రభుత్వం చెల్లించాల్సి ఉంది.

అనుకున్నంత ఇవ్వని బ్యాంకులు..

ఏ ఏడాదిలోనూ నిర్ణీత లక్ష్యం మేరకు తెలంగాణ రాష్ట్రంలో రైతులకు బ్యాంకులు రుణాలివ్వడం లేదు. గతేడాది (2020-21)లో వానాకాలం, యాసంగి (రబీ) సీజన్లలో కలిపి రూ.53,222 కోట్లను పంటరుణాలుగా ఇవ్వాలని బ్యాంకర్ల సమితి తొలుత లక్ష్యాన్ని నిర్దేశించింది. కానీ చివరికి అంతకన్నా రూ. 12,000 కోట్లు తగ్గించి రూ.41,200 కోట్లు మాత్రమే రైతులకు బ్యాంకులు ఇచ్చాయి. అంతకుముందు ఏడాది (2019-20)లో కూడా ఇలాగే లక్ష్యానికన్నా బ్యాంకులు చాలా తక్కువగా పంపిణీ చేసినందునే ఇతర రాష్ట్రాలకన్నా తెలంగాణ చాలా వెనుకబడిందని సీనియర్‌ వ్యవసాయాధికారి వివరించారు.

ఇక ఈ ఏడాది (2021-22)లో రూ.59,440 కోట్లు ఇవ్వాలని లక్ష్యం పెట్టుకున్నారు. వానాకాలం సీజన్‌ మొదలై ఇప్పటికే సగం దాదాపు అయిపోయింది. కానీ ఇంతవరకూ అందులో 3వ వంతు సొమ్ము కూడా పంపిణీ కాలేదని అంచనా. రుణమాఫీ వల్ల కొత్త రుణాలు తీసుకోడానికి రైతులు రావడం లేదని బ్యాంకులు చెబుతున్నాయి. బ్యాంకుకు వెళ్తే రుణమివ్వకుండా సిబ్బంది సతాయిస్తున్నారని తెలంగాణ రైతులు ఆరోపిస్తున్నారు. అంతిమంగా లక్ష్యం మేరకు రుణపంపిణీ మాత్రం జరగడం లేదు.

ఇదీ చూడండి: