సీఆర్డీఏ రద్దు, పాలన వికేంద్రీకరణ బిల్లులను గవర్నర్ ఆమోదానికి రాష్ట్ర ప్రభుత్వం పంపించింది. శాసనమండలిలో రెండోసారి ఈ బిల్లులను ప్రవేశపెట్టి నెల రోజులైంది. ఈ నిబంధన మేరకు గవర్నర్ బిశ్వభూషణ్‌ హరిచందన్‌కు బిల్లులను పంపించారు.
రాజ్యాంగంలోని 197వ అధికరణ క్లాజ్‌ 2 ప్రకారం బిల్లును ప్రభుత్వం రెండోసారి సభలో ప్రవేశపెట్టింది. మండలిలో పెట్టిన నెల రోజుల తర్వాత మండలి సాధారణ అనుమతిగా పరిగణిస్తూ గవర్నర్ ఆమోదం కోసం రెండు బిల్లులను అసెంబ్లీ అధికారులు పంపించారు.
అసలు ఏం జరిగిందంటే...
సీఆర్డీఏ రద్దు, పాలన వికేంద్రీకరణ బిల్లులను ప్రభుత్వం శీతాకాల సమావేశాల్లోనే అసెంబ్లీ ముందు ఉంచింది. ఆధిక్యం ఉన్న శాసనసభలో సులభంగానే బిల్లులు ఆమోదం పొందాయి. కానీ మండలికి వచ్చేసరికి మాత్రం ప్రభుత్వ వ్యూహం బెడిసి కొట్టింది. ఈ బిల్లుల ఆమోదానికి ప్రతిపక్షం ససేమిరా అంది. ముఖ్యంగా తెలుగుదేశం పార్టీ రూల్‌ 71 తీర్మానంతో పై చేయి సాధించింది. ఈ తీర్మానం నెగ్గడంతో ఈ రెండు బిల్లలపై సభలో ప్రస్తావన రాకుండానే సమావేశాలు ముగిశాయి.
ఈ చర్యతో అగ్రహం వ్యక్తం చేసిన ప్రభుత్వం మండలిని రద్దు చేయాలని నిర్ణయించింది. వెంటనే కేంద్ర ప్రభుత్వానికి సిఫార్సు చేసింది. ప్రస్తుతం ఆ దస్త్రం కేంద్రం వద్దే పెండింగ్ లో ఉంది. దీనిపై ఇంకా ఎలాంటి నిర్ణయం కేంద్రం తీసుకోలేదు. ఈ బిల్లుల విషయమై కోర్టులో పిటిషన్లు దాఖలయ్యాయి.