TRS Resolutions on Paddy Grain Procurement: పంజాబ్‌లో సేకరిస్తున్న మాదిరిగానే తెలంగాణలో పండించిన వడ్లను మొత్తం కొనుగోలు చేయాలని కోరుతూ.. ప్రధాని మోదీకి తీర్మానాలు పంపించాలని తెరాస అధిష్ఠానం నిర్ణయించింది. ఈ మేరకు నేటి నుంచి తెలంగాణలోని అన్ని గ్రామ పంచాయతీలు, మండల, జిల్లా పరిషత్‌లు, మార్కెట్‌ కమిటీలు, పురపాలక సంఘాలు, రైతుబంధు సమితుల్లో తీర్మానాలు చేసి పోస్టు, కొరియర్‌ల ద్వారా ప్రధాని మోదీకి, కేంద్ర మంత్రి పీయూష్‌గోయల్‌కు పంపించాలని ఆయా స్థానిక సంస్థల ప్రజాప్రతినిధులకు సూచించింది. వారి చిరునామాలను వాట్సప్‌ ద్వారా తెలియజేసింది. కాపీల ప్రతులను సీఎంకూ పంపించాలని సూచించింది.
Paddy Procurement Issue : కొంతకాలంగా కేంద్ర, రాష్ట్ర ప్రభుత్వాల మధ్య ధాన్యం వివాదం ముదురుతూనే ఉంది. రాష్ట్రాల్లో ఉత్పత్తి మేరకు ధాన్యం కొనుగోలు చేయలేమని కేంద్రం స్పష్టం చేయగా.. యాసంగిలో పండిన వడ్లను మొత్తం కొనాల్సిందేనని రాష్ట్ర ప్రభుత్వం స్పష్టం చేసింది. యాసంగిలో ఎక్కువగా నూకలే అవుతాయని.. వాటిని తెలంగాణ ప్రజలకు అలవాటు చేయాలని కేంద్ర మంత్రి పీయూష్‌ గోయల్‌ వ్యాఖ్యలపై మంత్రులు తీవ్ర స్థాయిలో ఆగ్రహం వ్యక్తం చేశారు. కేంద్ర మంత్రిపై విమర్శలు గుప్పించారు.