Face based attendance ముఖ ఆధారిత హాజరు నమోదుపై ఈనెల 1న ఉపాధ్యాయ సంఘాలతో మంత్రి బొత్స జరిపిన చర్చల్లో గందరగోళం నెలకొంది. భేటీ తర్వాత సంఘాల నాయకులు సాంకేతిక సమస్యలను పరిష్కరించేందుకు 15రోజులు సమయం ఇచ్చారని మీడియాకు వెల్లడించగా.. అలాంటిదేమీ లేదని ఆ తర్వాత మంత్రి బొత్స ప్రకటించారు. ఇందుకనుగుణంగా నిన్న జిల్లా విద్యాశాఖాధికారులకు కమిషనరేట్‌ నుంచి ఆదేశాలు వెళ్లాయి. ఉపాధ్యాయ సంఘాలతో జరిగిన చర్చల్లో హాజరు నమోదుకు... 15రోజుల అదనపు సమయం ఇచ్చినట్లు కొన్ని సంఘాలు చెబుతున్నది నిజం కాదని కమిషనరేట్‌ పేర్కొంది. ఉపాధ్యాయుల ముఖ ఆధారిత హాజరును సెప్టెంబరు 1 నుంచి తప్పనిసరిగా వేయాలని... దీన్ని ప్రధానోపాధ్యాయులందరికీ తెలియచేయాలని ఆదేశించింది. సాంకేతిక సమస్యలు వస్తే సరిదిద్దడానికి ఐటీ బృందానికి నివేదించాలని ఆదేశించింది.
అటు ఉపాధ్యాయ సంఘాలతో చర్చలకు భిన్నంగా అధికారుల వైఖరి ఉందంటూ ఐక్య ఉపాధ్యాయ సమాఖ్య యూటీఎఫ్, ఏపీటీఎఫ్లు విమర్శించాయి. ముఖ ఆధారిత హాజరు నమోదులో ఉన్న సాంకేతిక సమస్యలను వెంటనే పరిష్కరిస్తామని అధికారులు చెప్పినట్లు ఓ ప్రకటనలో సంఘాలు పేర్కొన్నాయి. అధికారులు చెప్పిన దానికి భిన్నంగా వ్యవహరించడం వల్ల ఉపాధ్యాయుల్లో అనుమానాలు వ్యక్తమవుతున్నాయన్నారు. ఫోన్లలో వ్యక్తిగత సమాచారం భద్రతపై మంత్రి బొత్స, అధికారులు ఇచ్చిన భరోసా వారిలో ఆత్మ విశ్వాసాన్ని కలిగించేదిగా లేదని మండిపడుతున్నారు. వ్యక్తిగత సమాచార భద్రత విషయంలో వాస్తవాలు నిర్దరించేందుకు ప్రభుత్వం ఒక టెక్నికల్‌ కమిటీ ఏర్పాటు చేయాలని డిమాండ్ చేశారు. తమ భద్రతకు భంగం వాటిల్లేటట్లు ఉంటే ..యాప్‌ను అంగీకరించేది లేదని తేల్చి చెప్పారు.