KCR 24 HOURS DEADLINE CENTRAL GOVT : రైతుల విషయంలో కేంద్రంతో తాడోపేడో తేల్చుకుంటామని తెలంగాణ ముఖ్యమంత్రి కేసీఆర్ పేర్కొన్నారు. సోమవారం దిల్లీ తెలంగాణ భవన్ వద్ద చేపట్టిన తెరాస నిరసన దీక్షలో పాల్గొన్న సీఎం.. కేంద్రంపై మరోసారి విరుచుకుపడ్డారు. తమ పోరాటానికి తెలంగాణ ప్రజలు, రైతులు సిద్ధంగా ఉన్నారని ప్రకటించారు.
24 గంటల డెడ్లైన్: కేంద్రానికి ఎదురుతిరిగితే సీబీఐ, ఈడీ కేసులు పెడతారన్న కేసీఆర్... భాజపాలో అందరూ సత్యహరిశ్చంద్రులే ఉన్నారా? అని ఎద్దేవా చేశారు. తనను జైలుకు పంపుతామని రాష్ట్ర భాజపా నేతలు అంటున్నారని ఈ సందర్భంగా గుర్తు చేశారు. ముఖ్యమంత్రిని జైల్లో వేస్తామంటారా? దమ్ముంటే రండి.. అని సవాల్ విసిరారు. ధాన్యం కొనుగోలు కోసం దేశవ్యాప్తంగా ఒకే విధానం ఉండాలని పిలుపునిచ్చారు. 24 గంటల్లో కేంద్రం ఏదో ఒక నిర్ణయం తీసుకోవాలని కేసీఆర్ డిమాండ్ చేశారు. లేని పక్షంలో తమ పోరాటం ఉద్ధృతం చేస్తామని హెచ్చరించారు.