తెలంగాణ సీఎం కేసీఆర్‌తో ప్రధాని నరేంద్ర మోదీ ఫోన్‌లో మాట్లాడారు. కేంద్ర మంత్రి హర్షవర్ధన్కు కేసీఆర్ చేసిన పలు విలువైన సూచనలను ప్రధానికి వివరించగా... సానుకూలంగా స్పందించిన మోదీ సీఎంకు ఫోన్ చేశారు. కేసీఆర్ ఇచ్చిన సలహాలను మంత్రి తనకు వివరించారని ప్రధాని తెలిపారు. సీఎం సూచనలు చాలా బాగున్నాయని మోదీ పేర్కొన్నారు. తప్పకుండా ఆచరణలో పెడుతామని మోదీ వివరించారు.
రాష్ట్రానికి మరింతగా ఆక్సిజన్, రెమిడిసివర్ ఇంజక్షన్లు సరఫరా చేయాలని సీఎం కేసీఆర్ ప్రధానికి విజ్జప్తి చేశారు. ఇందుకు మోదీ సానుకూలంగా స్పందించారు. సత్వరమే చర్యలు చేపడతామని కేసీఆర్కు హామీ ఇచ్చారు.
కేంద్ర మంత్రితో మాట్లాడిన కేసీఆర్
అంతకుముందు... కేంద్ర వైద్యారోగ్యశాఖ మంత్రి హర్షవర్దన్‌తో ముఖ్యమంత్రి కేసీఆర్ ఫోన్‌లో మాట్లాడారు. కరోనా నియంత్రణ కోసం రాష్ట్రం చేపడుతున్న చర్యలను సీఎం వివరించారు. కరోనాను నియంత్రించే క్రమంలో తీసుకోవాల్సిన చర్యల గురించి కేంద్ర మంత్రికి.... సీఎం కొన్ని విలువైన సూచనలు చేశారు.