'పాలమూరు పనులు పరుగెత్తాలి.. డిసెంబర్ కల్లా పూర్తి కావాలి'

పాలమూరు- రంగారెడ్డి ఎత్తిపోతల పనులు ఈ ఏడాది చివరికల్లా పూర్తి కావాలని తెలంగాణ ముఖ్యమంత్రి కేసీఆర్.. అధికారులకు స్పష్టం చేశారు. ఈ ఎత్తిపోతల కింద కాల్వల నిర్మాణాలకు వచ్చే 6 నెలల్లో రూ. 6 వేల కోట్లు విడుదల చేయాల్సిందిగా ఆర్థికశాఖను ఆదేశించారు. నార్లాపూర్, ఏదుల, వట్టెం వద్ద ఏర్పాటు చేయాల్సిన పంపులను త్వరలో బిగించాలన్న సీఎం.. నార్లాపూర్ నుంచి ఏదుల వరకు సొరంగ పనులు జూన్ నెలాఖరు కల్లా పూర్తి చేయాలని చెప్పారు. రాష్ట్రానికి దక్కాల్సిన న్యాయమైన నీటి వాటాను చుక్కనీరు పోకుండా ఒడిసి పట్టుకోవాల్సిందేనని ముఖ్యమంత్రి తేల్చిచెప్పారు.

తెలంగాణ పాలమూరు- రంగారెడ్డి ఎత్తిపోతల పనుల పురోగతిపై ఆ రాష్ట్ర ముఖ్యమంత్రి కేసీఆర్.. ఉన్నత స్థాయి సమీక్ష నిర్వహించారు. ప్రగతిభవన్​లో జరిగిన సమావేశంలో ఉమ్మడి మహబూబ్​నగర్​కు చెందిన మంత్రులు, ఎమ్మెల్యేలతోపాటు అధికారులు హాజరయ్యారు. తెలంగాణ ఉద్యమంలో మహబూబ్​నగర్ నీటిగోసను, నల్గొండ ఫ్లోరైడ్ కష్టాలను ప్రస్తావించకుండా తన ప్రసంగం సాగేది కాదన్న సీఎం... నాటి పాలకులు తెలంగాణ ప్రాజెక్టులను కావాలనే పెండింగులో పెట్టారని అన్నారు.

ఒక్కొక్కటిగా...

రాష్ట్ర ఆవిర్భావం అనంతరం ఆన్​గోయింగ్ పెండింగ్​ ప్రాజెక్టులను ఒక్కొక్కటిగా పూర్తి చేసుకుంటూ వస్తున్నామన్నారు. పాలమూరు- రంగారెడ్డి ఎత్తిపోతలను పూర్తి చేయాలన్న ప్రభుత్వ ప్రయత్నాలకు కొందరు దుర్మార్గంగా కోర్టుల్లో కేసులు వేసి స్టేల ద్వారా అడ్డుపడుతున్నారని ఆక్షేపించిన కేసీఆర్... అయినప్పటికీ పట్టుదలతో పనులు చేసుకుంటూ వస్తున్నట్లు తెలిపారు. జూరాల సహా ఇప్పటికే కల్వకుర్తి, నెట్టెంపాడు, భీమా వంటి ఆన్ గోయింగ్ ప్రాజెక్టులను పూర్తి చేసి దక్షిణ పాలమూరుకు చెందిన 11 లక్షల ఎకరాలకు సాగునీరు అందించినట్లు సీఎం చెప్పారు.

డిసెంబర్ కల్లా...

వాటిలో మిగిలిన పనులను త్వరగా పూర్తిచేసే విషయమై ఆలోచించాలని సీఎం కోరారు. కాళేశ్వరం స్పూర్తితో పనులు సాగాలని ఆకాంక్షించిన ముఖ్యమంత్రి.. ఎట్టి పరిస్థితుల్లోనూ పాలమూరు- రంగారెడ్డి ఎత్తిపోతల పనులు ఈ ఏడాది డిసెంబర్ కల్లా పూర్తికావాలన్నారు. గోదావరి, కృష్టా నదుల ప్రవాహాలకు తేడా ఉంటుందని సముద్రం వైపు ప్రవహించే కొద్దీ గోదావరి ప్రవాహం పెరుగుతూ పోతుంటే, కృష్టా ప్రవాహం తగ్గుతూ వస్తుంటుందని కేసీఆర్ విశ్లేషించారు.

ప్రమాదంలో నీటిలభ్యత...

వర్షాలు తగ్గిపోవడం, కృష్టాపై కర్ణాటక, మహారాష్ట్రలు నిర్మించిన ప్రాజెక్టులు, దిగువ రాష్ట్రం అక్రమంగా ఏర్పాటు చేసిన తూముల వల్ల నదిలో నీటి లభ్యత ప్రమాదంలో పడిపోయిందని అన్నారు. ఈ పరిస్థితుల్లో తెలంగాణకు దక్కాల్సిన న్యాయమైన నీటి వాటాను చుక్కనీరు పోకుండా ఒడిసి పట్టుకోవాల్సిందేనన్న ఆయన అందుకు పాలమూరు- రంగారెడ్డి ఎత్తిపోతల సహా కృష్ణా పెండింగ్ ప్రాజెక్టులను యుద్ధ ప్రాతిపదికన పూర్తిచేసుకోవాల్సి ఉందన్నారు.

పచ్చగా మార్చుకుందాం...

కృష్టా జలాలతో పాలమూరును పూర్తి స్థాయిలో పంట పొలాలతో పచ్చగా మార్చుకుందామన్న సీఎం.. ఈ ప్రాజెక్టు ఎంత త్వరగా పూర్తైతే రైతన్నలకు, వ్యవసాయ రంగానికి అంత మంచిదని అభిప్రాయపడ్డారు. పాలమూరు- రంగారెడ్డి పథకాన్ని జూరాలకు అనుసంధానించుకోవచ్చని వివరించారు.

భూ సేకరణ, పునరావాసం, విద్యుత్ సబ్ స్టేషన్ల నిర్మాణం, కాలువల తవ్వకం, పంపుల ఏర్పాటు, తదితర పనులకు సంబంధించి సమావేశంలో సీఎం చర్చించారు. నార్లాపూర్, ఏదుల, వట్టెం వద్ద ఏర్పాటు చేయాల్సిన పంపులను త్వరలో బిగించాలని.. నార్లాపూర్ నుంచి ఏదుల వరకు సొరంగం పనులను జూన్ నెలాఖరు కల్లా పనులు పూర్తి చేయాలని చెప్పారు.

ఇదీ చదవండి:అమ్మాయిలకు ఆ పాత చింతపండు కథలు.. ఇక చెప్పకండి..!