'కొవిడ్ థర్డ్‌ వేవ్‌ను ఎదుర్కొనేందుకు సిద్ధంగా ఉండాలి'

కొవిడ్ మూడో వేవ్​ను ఎదుర్కోనేందుకు ప్రభుత్వ యంత్రాంగం సిద్ధంగా ఉండాలని ముఖ్యమంత్రి జగన్ ఆదేశించారు. కరోనా వైరస్​తో సహజీవనం చేస్తూనే జాగ్రత్తలు పాటించాల్సి ఉందని వ్యాఖ్యానించారు. స్పందన కార్యక్రమంపై జిల్లా ఎస్పీలు, కలెక్టర్లతో వీడియో కాన్ఫరెన్సు ద్వారా మాట్లాడిన సీఎం వ్యాక్సినేషన్ వందశాతం పూర్తి అయ్యేంతవరకూ జాగ్రత్తలు తీసుకోవాల్సి ఉందన్నారు. ఈ నెల 9 తేదీ నుంచి 23 తేదీ వరకూ రైతు చైతన్య యాత్రలు నిర్వహించాల్సిందిగా ఆదేశాలు ఇచ్చారు. సచివాలయాల నుంచి మరో 200 పౌరసేవలు అందించనున్నట్లు సీఎం స్పష్టం చేశారు. కొవిడ్ తగ్గుముఖం పడితే తాను కూడా వారానికి రెండు సచివాలయాల సందర్శిస్తానన్నారు.

కొవిడ్ థర్డ్‌ వేవ్‌ను ఎదుర్కొనేందుకు ప్రభుత్వ యంత్రాంగం సిద్ధంగా ఉండాలని సీఎం జగన్ సూచించారు. స్పందన కార్యక్రమంపై ముఖ్యమంత్రి జగన్మోహన్​ రెడ్డి.. జిల్లా కలెక్టర్లు​, ఎస్పీలతో వీడియో కాన్ఫరెన్స్ నిర్వహించారు. తాడేపల్లి క్యాంపు కార్యాలయం నుంచి అధికారులతో వివిధ అంశాలపై మాట్లాడారు. ఇళ్ల నిర్మాణాలు, జగనన్న కాలనీలకు ఇసుక సరఫరా, కొవిడ్ నియంత్రణ చర్యలు, వ్యాక్సినేషన్ ప్రక్రియ తదితర అంశాలపై చర్చించారు. కొవిడ్‌తో సహజీవనం చేస్తూనే జాగ్రత్తలు పాటించాలని సీఎం జగన్​ సూచించారు. వ్యాక్సినేషన్ 100 శాతం పూర్తయ్యేవరకు జాగ్రత్తలు తీసుకోవాల్సి ఉందన్నారు. రెండో డోస్ వ్యాక్సిన్‌కు ప్రాధాన్యత ఇవ్వాలని అధికారులకు ఆదేశించారు.

ఈ- క్రాపింగ్​పై ధ్యాస పెట్టాలి..

వ్యవసాయ, సంబంధిత అంశాలపై కలెక్టర్లు దృష్టిపెట్టాలని సీఎం స్పష్టం చేశారు. జూలై 9వ తేదీ నుంచి 23వ తేదీ వరకూ రైతు చైతన్య యాత్రలు చేపట్టాలని నిర్ణయించినట్లు సీఎం వెల్లడించారు. ఈ సీజన్లో 94.84 లక్షల ఎకరాల్లో పంటలు వేయాలని లక్ష్యంగా పెట్టుకున్నామని.. అయితే ఇప్పటికి 4.98 లక్షల ఎకరాల్లో మాత్రమే పంటలు వేయటంపై సీఎం ఆరా తీశారు. ఈ- క్రాపింగ్‌పైన పూర్తిగా ధ్యాస పెట్టాలని సీఎం జగన్ ఆదేశించారు. పెట్టుబడి రాయితీ, బీమా, పంట కొనుగోళ్లు, రుణాలు, సున్నావడ్డీ పథకం అమలు ఇలా అన్ని అంశాలనూ ఈ-క్రాప్ ద్వారా పర్యవేక్షించే అవకాశముందని తెలిపారు. రైతు సాగు చేసిన భూమికి ఎలాంటి పత్రాలూ లేకపోయినా ఈ-క్రాప్​లో నమోదు చేయాలని ఆదేశించారు

" పంటలకు సంబంధించి అన్ని సమస్యలకు పరిష్కారం.. ఈ-క్రాపింగ్‌. ఈ-క్రాపింగ్‌పై కలెక్టర్లు, అధికారులు దృష్టి సారించాలి. రైతుకు శ్రీరామ రక్ష.. ఈ-క్రాపింగ్‌. రైతు ఎక్కడా మోసపోకూడదు.. అన్యాయం జరగకూడదు. ఏ పంటలు వేయాలి.. ఏవి వేయకూడదో రైతులకు తెలియాలి. విత్తనాల నాణ్యతను ఎప్పటికప్పుడు పరిశీలించాలి. వ్యవసాయ సలహా కమిటీల సదస్సులు తరచుగా జరగాలి. ప్రతినెల తొలి శుక్రవారం ఆర్‌బీకే స్థాయి సదస్సు జరగాలి". సీఎం జగన్‌

వారానికి రెండు సచివాలయాలు..

కలెక్టర్లు.. గ్రామ, వార్డు సచివాలయాల్లో రెండింటిని ప్రతివారం సందర్శించాలని సూచించారు. గ్రామ, వార్డు సచివాలయాల ద్వారా మరో 200 సేవలను అదనంగా ప్రజలకు అందించబోతున్నట్టు సీఎం స్పష్టం చేశారు. కొవిడ్‌ తగ్గుముఖం పడితే ఎమ్మెల్యేలతో కలిసి వారానికి రెండు మార్లు తాను కూడా సచివాలయాలను సందర్శిస్తానని సీఎం స్పష్టం చేశారు.

రాష్ట్రవ్యాప్తంగా జూన్ 30వ తేదీ వరకూ 3.4 లక్షల ఇళ్ల నిర్మాణ పనులు మొదలు అయ్యాయని సీఎం అన్నారు. ఈ నెలలో ప్రత్యేక డ్రైవ్ ద్వారా 6.65 లక్షల ఇళ్ల నిర్మాణ పనులు చేపట్టినట్లు చెప్పారు. వచ్చే ఏప్రిల్‌ – జూన్‌ నాటికి ఈ ఇళ్లను పూర్తి చేయాలని సీఎం అధికారులకు ఆదేశించారు. జూలై 8న రైతు దినోత్సవం కార్యక్రమాన్ని నిర్వహించనున్నట్టు సీఎం వెల్లడించారు. జూలై 22 న వైఎస్సార్ కాపు నేస్తం పథకం అమలు చేస్తున్నట్లు వివరించారు. ఈ నెల 29న జగనన్న విద్యా దీవెన పథకం అమలు అవుతుందన్నారు.

ఇదీ చదవండి: