రాష్ట్రంలోని ప్రతీ దిశా పోలీసు స్టేషన్ పరిధిలోనూ పెట్రోలింగ్ ప్రారంభించాలని ముఖ్యమంత్రి వైఎస్ జగన్ ఆదేశాలు జారీ చేశారు. ఇందుకోసం 900 స్కూటర్లను ఏర్పాటు చేసినట్లు సీఎం పేర్కోన్నారు. దీంతో పాటు దిశా పోలీసు స్టేషన్ కు అందిన ప్రతీ ఫిర్యాదుపైనా నాణ్యమైన సేవలు బాధితులకు అందేలా చూడాలని అందుకు సంబంధించిన కార్యాచరణ చేపట్టాలని సూచించారు. తాడేపల్లిలోని క్యాంపు కార్యాలయంలో దిశ చట్టం అమలు, పోలీసు స్టేషన్ల పనితీరుపై ముఖ్యమంత్రి జగన్ సమీక్ష నిర్వహించారు.
దిశ చట్టంతో పాటు, మొబైల్ యాప్, టోల్ ఫ్రీ నంబర్లకు సంబంధించిన వివరాలను గ్రామ, వార్డు సచివాలయాలతో పాటు, ప్రజలు ఎక్కువగా వచ్చి పోయే ప్రాంతాలు, వారు సమావేశమయ్యే చోట్ల పోస్టర్ల ద్వారా ప్రచారం చేయాలని సీఎం ఆదేశాలు జారీ చేశారు. మహిళలు, చిన్నారులపై నేరాలకు సంబంధించి విచారణకు ప్రత్యేక కోర్టులు ఏర్పాటు ప్రక్రియపైనా సీఎం జగన్ ఆరా తీశారు. వీలైనంత త్వరగా ప్రత్యేక కోర్టులు ఏర్పాటయ్యేలా చర్యలు తీసుకోవాలని ఆయన స్పష్టం చేశారు. దిశ చట్టం అమలు కోసం నేర శిక్షా స్మృతిలో సవరణలు చేస్తూ పంపిన బిల్లుకూ కేంద్రం ఆమోదం వచ్చేలా చర్యలు తీసుకోవాలని ముఖ్యమంత్రి సూచించారు. త్వరితగతిన ఫోరెన్సిక్ ల్యాబ్ లను ఏర్పాటు చేసుకోవాలని ముఖ్యమంత్రి ఆదేశాలు ఇచ్చారు.
మరోవైపు రాష్ట్రంలో సైబర్ భద్రత కోసం కియోస్క్ లను ఏర్పాటు చేస్తామని అధికారులు సీఎంకు వివరించారు. ఫోన్ లు, ల్యాప్ టాప్ ల భద్రతను పరీక్షించుకోవచ్చని వెల్లడించారు. ప్రతి పోలీస్‌స్టేషన్‌లో దిశ మహిళా హెల్ప్‌ డెస్క్‌ల ఏర్పాటు చేయటంతో పాటు సైకాలజిస్టుల నుంచి న్యాయ సహాయం లభించేలా చూడాలని అధికారులు కోరారు. ఇప్పటి వరకూ దిశా యాప్ 11 లక్షల డౌన్ లోడ్లు పూర్తి చేసుకుందని అధికారులు సీఎం కు వివరించారు. అలాగే ఈ యాప్ ద్వారా 107 ఎఫ్ఐఆర్ లు నమోదు చేసినట్టు డీజీపీ సహా అధికారులు సీఎంకు తెలిపారు. దిశ చట్టం కింద ఇప్పటి వరకూ 390 కేసులు నమోదు అయ్యాయని స్పష్టం చేశారు. ఈ కేసుల్లో 7 రోజుల్లోపు ఛార్జి షీటు దాఖలు చేసినట్టు అధికారులు వివరించారు. 74 కేసుల్లో శిక్షలు కూడా ఖరారు అయ్యాయని.. మూడు మరణశిక్షలు, ఐదు గురికి జీవిత ఖైదు, ఇద్దరికి 20 ఏళ్ల చొప్పున శిక్ష పడినట్టు తెలిపారు.