మత్స్యకార జీవితాలు, రాష్ట్రంలో మత్స్య పరిశ్రమ రూపురేఖలు మారబోతున్నాయని సీఎం జగన్ అన్నారు. మత్స్యకారులకు ఇచ్చిన ప్రతి వాగ్దానాన్ని నెరవేరుస్తూ వస్తున్నామని స్పష్టం చేశారు. ప్రపంచ మత్స్య దినోత్సవం సందర్భంగా రాష్ట్రంలో 4 ఫిషింగ్‌ హార్బర్లకు సీఎం జగన్ వర్చువల్ పద్ధతిలో శంకుస్థాపన చేశారు. వీటి కోసం.. రూ.1510 కోట్లు వెచ్చిస్తున్నట్టు సీఎం తెలిపారు. మరో 4 ఫిషింగ్‌ హార్బర్ల ఏర్పాటుకు ప్రయత్నాలు చేస్తున్నట్లు వెల్లడించారు. ప్రతి నియోజకవర్గంలో ఆక్వా హబ్‌ల ఏర్పాటుకు ప్రయత్నిస్తున్నామన్నారు. మరో రూ.10 వేల కోట్లతో 3 పోర్టుల నిర్మాణానికి శ్రీకారం చుడుతున్నామని సీఎం తెలిపారు.
మత్స్యకారుల జీవితాలు దయనీయ పరిస్థితుల్లో ఉండటాన్ని పాదయాత్రలో గమనించానని సీఎం విచారం వ్యక్తం చేశారు. అవసరమైనన్ని పోర్టులు, ఫిషింగ్‌ హార్బర్లు లేకపోవడాన్ని పరిశీలించినట్లు పేర్కొన్నారు. ఎన్నికల సమయంలో మత్స్యకారుల సంక్షేమం కోసం 3 వాగ్దానాలు చేసినట్లు గుర్తు చేశారు. చేపల వేట నిషేధ సమయంలో మత్స్యకార కుటుంబాలకు రూ.10 వేలు చొప్పున ఇస్తున్నట్లు తెలిపారు.