జంతువుల్లో కరోనా వైరస్‌ పరీక్షలు ఏవిధంగా చేయాలనే దానిపై ప్రత్యేక విధానాలు (స్టాండర్‌ ఆఫ్‌ ప్రొసిజర్స్‌) రూపొందిస్తున్నామని.. త్వరలోనే వాటిని సెంట్రల్‌ జూ అథారిటీకి పంపుతామని సీసీఎంబీ మాజీ డైరెక్టర్, సలహాదారు డాక్టర్‌ రాకేశ్ మిశ్రా తెలిపారు. వన్యప్రాణుల నోటి నుంచి లాలాజలం, ముక్కు నుంచి స్రావాలను సేకరించి పరీక్ష చేయడం అంత సులువు కాదని.. జంతువుల మలం సేకరించి వాటి ద్వారా కరోనా పరీక్షలు చేపట్టే పద్ధతులపై అభివృద్ధిపై పరిశోధనలు చేస్తున్నామని తెలిపారు.
దేశంలోనే తొలిసారిగా హైదరాబాద్‌ జూలో సింహాలకు కరోనా పాజిటివ్‌ వచ్చిందని.. ఫలితంగా.. వైరస్‌ అనేది ఏ జీవికైనా సోకే అవకాశముందని తేలిందని రాకేశ్ మిశ్రా అన్నారు. దీన్ని ఆదిలోనే నియంత్రించాలని సూచించారు. లేకపోతే వైరస్‌లకు కేంద్రంగా ఉండే జంతువులతో కొత్త వైరస్‌ రకాలు పుట్టుకొస్తే మనుషులకు అది మరింత ప్రమాదకరం అన్నారు. మాస్క్‌లు, పీపీఈ కిట్లు రహదారులపై పడేయడం అనాగరికమని.. పారేసిన మాస్క్‌లను జంతువులు తినడం, మూతితో తాకే అవకాశం ఉందని చెప్పారు.